इंजिनिअरिंगचं शिक्षण घेत असलेली सोन्यासारखी मुलगी जीवानिशी गेली, अनुपमासोबत बॉयफ्रेंडने काय केलं?
engineering student anupama murder case : पाटणा येथे इंजिनिअरिंग विद्यार्थिनीच्या हत्येचा उलगडा झाला असून लग्नासाठी दबाव टाकल्याने प्रियकरानेच तिचा गळा दाबून खून केल्याचे पोलीस तपासात उघड झाले आहे. बिहटा पोलिसांनी सीसीटीव्ही आणि कॉल डिटेल्सच्या आधारे आरोपी अथर्व श्रीवास्तवला अटक केली असून त्याने आपला गुन्हा मान्य केला आहे.
ADVERTISEMENT
बातम्या हायलाइट
इंजिनिअरिंगचं शिक्षण घेत असलेली सोन्यासारखी मुलगी जीवानिशी गेली
अनुपमासोबत बॉयफ्रेंडने काय केलं?
engineering student anupama murder case : बिहारची राजधानी पाटणा येथील बिहटा पोलीस ठाण्याच्या हद्दीत एका इंजिनिअरिंग विद्यार्थिनीच्या हत्येचे गुढ अखेर उकलले आहे. या खळबळजनक घटनेत विद्यार्थिनीचा जीव तिच्याच प्रियकराने घेतल्याचे पोलीस तपासात स्पष्ट झाले आहे. अनुपमा असे मृत विद्यार्थिनीचे नाव असून ती औरंगाबाद जिल्ह्यातील रहिवासी होती आणि बिहटा येथे बीटेक डिप्लोमाच्या अंतिम वर्षाचे शिक्षण घेत होती. या हत्याकांडाचा मुख्य सूत्रधार अथर्व श्रीवास्तव याला पोलिसांनी अटक केली असून, त्याने रागाच्या भरात अनुपमाची हत्या करून खोलीला बाहेरून कुलूप लावून पळ काढला होता. या घटनेमुळे शैक्षणिक परिसरात आणि विद्यार्थ्यांमध्ये भीतीचे वातावरण पसरले आहे.
लॅपटॉप देण्याच्या बहाण्याने भेट आणि लग्नाचा वाद
पोलिसांनी दिलेल्या माहितीनुसार, आरोपी अथर्व श्रीवास्तव हा मूळचा बक्सरचा रहिवासी असून त्याचे आणि अनुपमाचे गेल्या अनेक दिवसांपासून प्रेमसंबंध होते. रविवारी रात्री अथर्व हा अनुपमाला लॅपटॉप देण्याच्या बहाण्याने तिच्या राघोपूर येथील भाड्याच्या खोलीवर पोहोचला होता. अनुपमा अनेक दिवसांपासून अथर्वकडे लग्नासाठी तगादा लावत होती, परंतु अथर्व लग्नासाठी तयार नव्हता. त्या रात्री याच विषयावरून दोघांमध्ये तीव्र बाचाबाची झाली. वादाचे रूपांतर हाणामारीत झाले आणि संतापलेल्या अथर्वने अनुपमाचा गळा दाबून तिची जीवनयात्रा संपवली. हत्येनंतर पुरावे नष्ट करण्याच्या उद्देशाने त्याने खोली बाहेरून बंद केली आणि तिथून पळ काढला, मात्र पोलिसांनी तांत्रिक तपासाच्या आधारे त्याला शोधून काढले.
सीसीटीव्ही आणि सीडीआरमुळे आरोपी पोलिसांच्या जाळ्यात
सिटी एसपी वेस्ट भानु प्रताप सिंह यांनी या प्रकरणाचा खुलासा करताना सांगितले की, घटनेची माहिती मिळताच विशेष तपास पथकाची (SIT) स्थापना करण्यात आली होती. फॉरेन्सिक टीमने (FSL) घटनास्थळावरून महत्त्वाचे पुरावे गोळा केले. तपासादरम्यान पोलिसांनी परिसरातील सीसीटीव्ही फुटेज तपासले आणि अनुपमाच्या मोबाईलचे कॉल डिटेल्स रेकॉर्ड (CDR) खंगाळले. यामध्ये अथर्वचे लोकेशन आणि संशयास्पद हालचाली समोर आल्या. पोलिसांनी त्याला ताब्यात घेऊन विचारपूस केली असता त्याने आपला गुन्हा कबूल केला. शवविच्छेदन अहवालानंतर मृत्यूच्या कारणांविषयी अधिक स्पष्टता येईल, असे पोलिसांनी सांगितले असून सध्यातरी बलात्कार झाल्याच्या कोणत्याही प्राथमिक खुणा आढळलेल्या नाहीत.
अनुपमा ही आपल्या कुटुंबाची मोठी आशा होती आणि लवकरच तिचे इंजिनिअरिंगचे शिक्षण पूर्ण होणार होते. मात्र, एका क्षणिक रागामुळे आणि लग्नाच्या वादातून तिचा असा दुर्दैवी अंत झाला आहे. या घटनेची बातमी समजताच तिच्या औरंगाबाद येथील मूळ गावी शोककळा पसरली असून नातेवाईकांनी आरोपीला कठोर शिक्षा देण्याची मागणी केली आहे. पोलिसांनी आरोपी अथर्वला तुरुंगात पाठवले असून पुढील कायदेशीर प्रक्रिया सुरू केली आहे. एका महत्त्वाकांक्षी विद्यार्थिनीच्या हत्येमुळे पाटण्यातील शैक्षणिक वर्तुळात हळहळ व्यक्त केली जात असून प्रेमसंबंधातून घडणाऱ्या अशा हिंसाचाराच्या घटनांनी सुरक्षेचा प्रश्न पुन्हा एकदा ऐरणीवर आला आहे.
