धुळे : शिरपूर तालुक्यात १२ मोरांच्या मृत्यूमुळे खळबळ

जैतपूर गावात बागायती शेती केली जाते. या भागात बारमाही पिकं घेतली जात असल्यामुळे अन्नधान्य आणि पाण्याचाही मुबलक पुरवठा आहे. म्हणूनच या भागात मोरांचं प्रमाण आढळून येतं. मोरांच्या मृत्यूचं कारण अद्याप समजू शकलेलं नसलं तरीही कापूस लागवडीवेळी शेतकरी बियाणांना विषारी औषध लावतात. हेच बियाणं मोरांनी उकरुन खाल्ल्याचा अंदाज व्यक्त केला जात आहे.

जैतपूर परिसरात सकाळी नागरिकांना मोराचे मृतदेह आढळून आल्यानंतर त्यांनी वन विभागाला याबद्दल माहिती दिली. वन विभागाच्या अधिकाऱ्यांनीही मोरांचे मृतदेह ताब्यात घेतले आहेत. प्राथमिक तपासणी केली असतान मोरांना अन्नातून विषबाधा झाल्याचं सांगण्यात येत आहे.