पुण्यात Door to Door Vaccination ला होणार सुरूवात, मुंबईकर अद्यापही प्रतीक्षेतच

‘गेल्या दीड वर्षांपासून मी घरी आहे, मला आनंद झाला आहे की पुणे महापालिकेने घरोघरी जाऊन लसीकरण मोहिम राबवण्याचा निर्णय घेतला आहे. या मोहिमेचा फायदा माझ्यासारख्या अनेक ज्येष्ठ नागरिकांना होईल’ असं लता धोत्रे यांनी मुंबई तकला सांगितलं.

‘जे लोक स्मार्ट फोन वापरत नाहीत, शिवाय गेल्या काही महिन्यांपासून त्यांच्या घराबाहेर पडलेले नाहीत त्यांच्यासाठी दारोदारी जाऊन लस देण्याची मोहीम महत्त्वाची ठरणार आहे. आम्हाला लोकांकडून चांगला प्रतिसाद मिळू लागला आहे. ते या मोहिमेबाबत खुश आहेत अशी प्रतिक्रिया पुणे महापालिकेच्या आरोग्य अधिकारी डॉ. संध्या यांनी दिली.

इतर राज्यांमध्ये यशस्वीरित्या घरात जाऊन किंवा लोकांच्या जवळ जाऊन कोरोना प्रतिबंधक लस दिली जात असेल तर ते महाराष्ट्रात का होऊ शकत नाही. राज्य सरकारच्या अधिकाऱ्यांना यातून प्रेरणा घ्यायला सांगा असंही खंडपीठाने सांगितलं आहे. राज्याचे महाधिवक्ता आशुतोष कुंभकोणी यांनी सांगितलं की अंथरुणाला खिळलेल्या व घराबाहेर पडू न शकणाऱ्यांना घरी जाऊन लस देण्यासाठी राज्य सरकार केंद्राची मंजुरी घेणार नाही. राज्य सरकार स्वतःहूनच निर्णय घेईल त्यासाठी विशिष्ट इमेल आयडीही प्रसिद्ध केला जाईल. ज्यांच्या कुटुंबात अंथरूणाला खिळलेले किंवा घराबाहेर पडू न शकणारे वृद्ध नागरिक आहेत त्यांच्याकडून विनंती आल्यानंतर पुढील प्रक्रिया केली जाईल असंही त्यांनी स्पष्ट केलं.