समजा, वंदे मातरम् म्हटलं नाही तर गोळ्या घालणार की फासावर लटकवणार? वारिस पठाण यांचा सवाल

राष्ट्रपिता महात्मा गांधी यांच्या जयंतीनिमित्त राज्यभरात 'हॅलो नव्हे- वंदे मातरम्' अभियानाचा शुभारंभ वर्धा येथून होत आहे. यासाठी जनतेला आवाहन करणारे परिपत्रक प्रसिद्ध करण्यात आले आहे. हे अभियान यशस्वी करण्याचा निर्धार सांस्कृतिक कार्य मंत्री @SMungantiwar यांनी व्यक्त केला आहे. pic.twitter.com/DmsssrEEe9

— MAHARASHTRA DGIPR (@MahaDGIPR) October 1, 2022

दरम्यान सरकारच्या या निर्णयावर एमआयएम नेते आणि माजी आमदार वारिस पठाण यांनी निशाणा साधला आहे.

काय म्हणाले वारिस पठाण?

वारिस पठाण म्हणाले, भाजपजवळ काही मुद्देच शिल्लक राहिलेले नाहीत. कधी शहरांची नावं बदलायची तर कधी वंदे मातरम म्हणायला लावायचं. पण ही सगळी बेरोजगारी म्हणजे केवळ महागाईवरून लक्ष वळवण्याचे नाटकं आहेत. या निर्णयामुळे बेरोजगारी दुर होणार आहे का? महागाई कमी होणार आहे का? शेतकऱ्यांच्या आत्महत्या थांबणार आहेत का?

अभियानाची सुरुवात पण हे कोणत्या दिवशी करत आहेत, तर महात्मा गांधी यांच्या जयंतीदिवशी. जे महात्मा गांधी फादर ऑफ नेशन आहेत, त्यांना नथुराम गोडसेने मारले. तो देशाचा पहिला दहशतवादी होता, त्याची तर हे सगळे पुजा करतात. गोडसे मुर्दाबाद हे तर त्यांच्या तोंडून कधी येणार नाही. फक्त अशा काही तरी मुद्द्यांवर लक्ष बाजूला करायचं आणि द्वेषाचे पसरवायचा हेच यांचे राजकारण आहे, असा हल्लाबोल पठाण यांनी केला.

समजा जर कोणी वंदे मातरम् म्हणाले नाही तर ते काय करायचे? गोळी मारणार का? त्याच्यावर गुन्हा दाखल करणार? त्याला तुरुंगात टाकणार की त्याला फासावर लटकवणार? हेही भाजपच्या नेत्यांना सांगावे लागेल. संविधानाने वंदे मातरम म्हणायला सांगितले आहे का? असाही सवाल पठाण यांनी उपस्थित केला. बेरोजगारी, महागाईवर कोणी त्यांच्याशी बोलले तर ते चित्त्यापेक्षा वेगाने पळून जातील, असा टोलाही यावेळी त्यांनी लगावला.