युक्रेनमध्ये आणखी एका भारतीय विद्यार्थ्याचा मृत्यू

युक्रेनमध्ये वैद्यकीय शिक्षण घेणाऱ्या चंदन जिंदाल या विद्यार्थ्याचा मृत्यू झाला आहे. तो मूळचा पंजाबचा होता. 2018 मध्ये वैद्यकीय शिक्षण घेण्यासाठी तो युक्रेनला गेला होता. त्याच्या मेंदूत रक्ताची गुठळी झाल्याने त्याला रूग्णालयात दाखल करण्यात आलं होतं. तो बेशुद्ध झाला होता आणि उपचारादरम्यानच त्याची प्राणज्योत मालवली. चंदन जिंदाल हा तरूण युक्रेनच्या विनित्सिया शहरात असलेल्या वैद्यकीय महाविद्यालयात शिक्षण घेत होता. या आधी कर्नाटकच्या नवीन नावाच्या मुलाचा युक्रेनमध्ये मृत्यू झाला ही माहिती मंगळवारी समोर आली होती. तो किराणा सामान आणण्यासाठी सुपर मार्केटला गेला होता त्यावेळी शेलिंगमध्ये त्याचा मृत्यू झाला असं सांगण्यात आलं होतं.

#Watch | Chandan Jindal, an Indian national in Ukraine's Vinnytsia lost his life due to natural causes. His family members are also in Ukraine: Arindam Bagchi, MEA spokesperson pic.twitter.com/zeH0V9k124

— ANI (@ANI) March 2, 2022

दुसरीकडे परराष्ट्र मंत्रालयाने एक अॅडव्हायजरी लागू केली आहे. ज्यानुसार खार्किव्हमधून सर्व भारतीयांना हे शहर सोडण्यास सांगितलं आहे. असाल तसे खार्किव्हमधून बाहेर पडा असं सांगण्यात आलं आहे. आज तकच्या बातमीनुसार ही अॅडव्हायजरी लागू केल्यानंतर एक क्रूज मिसाईल सिटी कौन्सिलच्या इमारतीवर आदळलं आहे.

धगधगतं युक्रेन! बेलारुसच्या सीमेवर रशियन शिष्टमंडळाला भेटण्यास तयार- झेलेन्स्की

परराष्ट्र मंत्रालयाने बुधवारी संध्याकाळीच यासंदर्भातली अॅडव्हायजरी लागू केली आहे. खार्किव्हमध्ये बिकट परिस्थिती आहे. जे भारतीय विद्यार्थी, नागरिक या शहरात अडकले आहेत त्यांनी तातडीने हे शहर सोडावं असे निर्देश देण्यात आले आहेत. एवढंच नाही भारतीय नागरिकांनी स्वतःच्या सुरक्षेसाठी खार्किव्ह सोडलं पाहिजे असंही यात नमूद करण्यात आलं आहे. Pesochin, Baybaye आणि Bezlyudovka च्या दिशेने पुढे जा असंही सांगण्यात आलं आहे.

खार्किव्ह हे युक्रेनमधलं एक मोठं शहर आहे. रशियन सैन्याकडून या शहरावर सातत्याने हल्ले केले जात आहेत. या हल्ल्यात एका भारतीय विद्यार्थ्याचा मृत्यूही झाला आहे. नवीन असं त्या विद्यार्थ्याचं नाव होतं तो कर्नाटकचा राहणारा होता. याआधी भारतीय दुतावासाने भारतीय विद्यार्थ्यांच्या सुरक्षेच्या दृष्टीने अॅडव्हायजरी जारी केली आहे. युक्रेनमध्ये अडकलेल्या भारतीय विद्यार्थ्यांना तिथून एअरलिफ्ट करण्यासाठी केंद्र सरकारने ऑपरेशन गंगाही सुरू केलं आहे.