जय भवानी जय शिवाजीच्या घोषणांनी दुमदुमलं औरंगाबाद, शिवरायांच्या भव्य पुतळ्याचं अनावरण

औरंगाबादमध्ये छत्रपती शिवाजी महाराजांच्या 61 फुटी पुतळ्याचं थाटात अनावरण करण्यात आलं. शुक्रवारी रात्री 12 वाजता म्हणजेच 19 फेब्रुवारी ही तारीख लागल्यानंतर हा सोहळा पार पडला. पर्यटन मंत्री आदित्य ठाकरेंनी या पुतळ्याचं अनावरण केलं. औरंगाबादच्या क्रांती चौकात हातात भगवे झेंडे घेऊन असंख्य कार्यकर्ते जमले होते. औरंगाबादचा क्रांती चौक जय भवानी जय शिवाजीच्या घोषणांनी क्रांतीचौक दुमदुमला होता. ढोलताशांचा गजर, आतशबाजी, लेझर शो अशा थाटात छत्रपती शिवाजी महाराजांच्या पुतळ्याचं अनावरण करण्यात आलं.

महाराष्ट्राचे पर्यटन मंत्री आदित्य ठाकरे यांनी औरंगाबाद महापालिकेतर्फे तयार करण्यात आलेल्या छत्रपती शिवरायांच्या 61 फुटी पुतळ्याचं अनावरण केलं. या सोहळ्याला सर्वपक्षीय नेते हजर होते. तसंच असंख्य शिवप्रेंमीची या सोहळ्याला गर्दी झाली होती. छत्रपती शिवाजी महाराजांची जयंती औरंगाबादमध्ये अशा प्रकारे पहिल्यांदाच साजरी करण्यात आली.

छत्रपती शिवाजी महाराज हे महाराष्ट्राचं आराध्य दैवत आहे. आज शिवजयंती असल्याने औरंगाबादमध्ये आजचाच मुहूर्त साधून 61 फुटांच्या पुतळ्याचं अनावरण करण्यात आलं. फटाक्यांची आतशबाजी, भगवे झेंडे, फुलांनी सजवलेला पुतळा, क्रांतीचौकातलं उत्साहाचं वातवरण, ढोल ताशांचं पथक अशा सगळ्या थाटात आणि जय भवानी जय शिवाजी या घोषणा देत संध्याकाळपासूनच अनेक लोक या क्षणाची वाट बघत होते. अखेर रात्रीचे 12 वाजले 19 फेब्रुवारी ही तारीख लागली आणि या भव्य पुतळ्याचं अनावरण करण्यात आलं. उपस्थित असलेल्या असंख्य लोकांनी हा क्षण आपल्या डोळ्यात आणि मोबाइल कॅमेरात साठवून घेतला.

औरंगाबाद मधील छत्रपती शिवाजी महाराजांच्या देशातील सर्वात उंच पुतळ्याचे अनावरण सोहळ्याचे प्रक्षेपण फेसबुकवरूनही लाइव्ह करण्यात आलं. या कार्यक्रमाला राज्याचे मुख्यमंत्री उद्धव ठाकरे हे स्वतः ऑनलाइन तर आदित्य ठाकरे,सुभाष देसाई, केंद्रीय अर्थ राज्यमंत्री डॉ भागवत कराड हे प्रत्यक्षात उपस्थित राहिले होते. मराठवाड्यात पार पडलेला हा सर्वात मोठा शिवजयंती सोहळा ठरला आहे.