NDRF च्या पथकांकडून कोल्हापूरच्या पूरग्रस्तांचं मदत आणि बचावकार्य सुरू

कोल्हापूरमध्ये NDRF च्या तीन तुकड्या दाखल झाल्या आहेत. आणखी चार तुकड्या कोल्हापूर विमानतळावर दाखल होतील. यात 25 जवान आणि तीन बोटींचा समावेश आहे. गेल्या चार दिवसात कोल्हापूरमध्ये विक्रमी पाऊस झाला आहे. 2019 ला झालेल्या महापुराच्या वेळी पंचगंगा नदीची पाणी पातळी 55.6 इंचांवर होती. यावर्षी नदीची पाणी पातळी 56 फुटांवर गेली आहे. त्यामुळे कोल्हापूरकर पुराच्या तडाख्यात अडकले आहेत.

मध्यरात्रीपासून कोल्हापुरात पावसाने उसंत घेतली आहे. मध्यरात्री पंचगंगा नदीचं पाणी 56 फुटांवर होतं. धरण क्षेत्रात पाऊस पडतो आहे. आज सकाळपासून तीन इंचाने पाणी पातळी उतरली आहे. पुणे बंगलोर राष्ट्रीय मार्गावर अजूनही पाणी असल्याने दोन्ही बाजूंकडील वाहतूक ठप्प आहे.

Maharashtra | Teams of the National Disaster Response Force (NDRF) are engaged in rescue and relief operations in flood-affected Kolhapur pic.twitter.com/ULp5KckSsX

— ANI (@ANI) July 24, 2021

महापुराचे पाणी रस्त्यावर आल्याने अनेक मार्ग बंद झाले आहेत. किणी टोल नाका तसेच बेळगाव जिल्ह्यतील यमगर्णी व निपाणी येथे रस्त्यावर पाणी आल्याने पुणे-बंगळुरु राष्ट्रीय महामार्गावरील वाहतुकीत अडथळे आले आहेत. पुणेबंगळुरु महामार्गालगत सांगली फाटा ते कोल्हापूरकडे जाणारा व बंगळुरु-पुणेकडून शिरोलीकडे जाणाऱ्या सेवा मार्गावर 4 फूट पाणी असल्याने बंद करण्यात आला आहे. या ठिकाणी बेरीकॅटिंग करून पोलीस बंदोबस्त ठेवण्यात आला आहे.

जिल्ह्यत अनेक ठिकाणी वीजपुरवठय़ाचा बोजवारा उडाला. कोल्हापूर शहर विभागातील ३ उपकेंद्रे, १९ वीजवाहिन्या, 503 वितरण रोहित्रे बंद असल्याने 50 हजार 323 ग्राहकांचा वीजपुरवठा बाधित झाला. दोन्ही ग्रामीण विभागातील 72 हजार ग्राहकांच्या वीजपुरवठय़ावर परिणाम झाला आहे. याच्या नियंत्रणासाठी पुणे प्रादेशिक विभागाचे संचालक अंकुश नाळे कोल्हापुरात दाखल झाले आमि त्यांनी परिस्थितीचा आढावा घेतला.