मॉन्टी लहानपणापासूनच भांडकुदळ! MNS नेत्याने जागवल्या Siddarth Shukla च्या लहानपणीच्या आठवणी

सिद्धार्थ शुक्ला हा माझा बालपणीचा मित्र. त्याचं नाव सिद्धार्थ आहे, हे मला तो ‘फेमस’ झाल्यावर कळलं. आमच्यासाठी तो ‘मॉन्टी’ (मोन्टू) होता. मुंबई सेंट्रलला ज्या कॉलनीत मी लहानाचा मोठा झालो, तिथेच मॉन्टी राहायचा. बाजूच्या बिल्डिंगमध्ये. शाळेच्या दिवसांतच मॉन्टी सहा फुटांपेक्षा उंच झाला. ‘देखणा’ काडी पैलवान. एकदम शिडशिडीत. पण एक नंबरचा भांडकुदळ. प्रत्येकाशी भांडण उकरून काढणं, ‘उंगल्या’ करणं हा त्याचा एकमेव छंद. स्वभावच म्हणा ना. मॉन्टी माझ्यापेक्षा एक-दोन वर्षाने लहान. आम्ही पिकनिकला गेलो तरी कुणाचीतरी खोड काढल्याशिवाय त्याला स्वस्थ वाटायचं नाही. पण पुढे मॉडेलिंग आणि नंतर अभिनयाच्या क्षेत्रात गेल्यावर तो शांत झाला. एकदम परिपक्व व्यक्तिमत्व. उंची होतीच, पण व्यायामाने त्याने शरीर कमावलं. त्याला जाहिराती मिळू लागल्या. ‘बिग बॉस’ विजेता ठरला, तेव्हा तो लोकप्रियतेच्या शिखरावर पोहोचला. ‘बॉम्बे टाइम्स’ पुरवणीत तो ‘हॉट’ असल्याच्या बातम्या-लेख रोज येऊ लागले. एक मित्र म्हणून मला गंमत वाटायची… ‘सिद्धार्थ शुक्लाचे निधन’ अशा बातम्या धडकल्या आणि बालपणीच्या या आठवणी जाग्या झाल्या. खोडकर मित्रा मॉन्टी, तुझ्या चाहत्यांना हा धक्का पचणारा नाही. मॉन्टीला श्रद्धांजली.

किर्तीकुमार शिंदे यांची फेसबूक पोस्ट, जशीच्या तशी