नागपूरमध्ये शिवसेनेला धक्का, १९ वर्ष पक्षाशी एकनिष्ठ असलेले शेखर सावरबांधे NCP मध्ये दाखल

गेल्या काही दिवसांपासून नागपूरमध्ये शिवसेनेकडून आयात होत असलेल्या उमेदवारांमुळे सावरबांधे नाराज असल्याचं दिसून येत होतं. पक्ष नेतृत्वाकडून आपल्याला डावललं जात असल्याची भावना सावरबांधेंच्या मनात होती. नागपूर शहरात शिवसेना पक्ष वाढवण्यासाठी सावरबांधे यांनी मोलाची भूमिका बजावली होती. त्यामुळे ऐन निवडणुकीच्या वेळी सावरबांधेंचं पक्षाला रामराम करणं हे धोक्याचं मानलं जातंय.

आयात उमेदवारांना पक्षात मानाचं स्थान मिळत असलेल्या नाराजी मुळे सावरबांधेंनी पक्ष सोडल्याचं कळतंय. मिळालेल्या माहितीनुसार सावरबांधेंसह आणखी काही जिल्हा आणि तालुका प्रमुख पक्ष नेतृत्वावर नाराज असल्याचं कळतंय. सावरबांधेंच्या पाठोपाठ ही मंडळही शिवसेना सोडण्याच्या तयारीत असल्याचं बोललं जातंय. शिवसेनेचा मुख्यमंत्री झाल्यानंतरही शिवसेना नेत्यांची छोटी-मोठी कामं होत नव्हती. यामुळेच स्थानिक शिवसेना कार्यकर्त्यांमध्ये नाराजीचा सूर पहायला मिळत आहे. यावर वेळेत तोडगा न काढल्यास पक्षाचं खिंडार आणखी मोठं होईल अशी भीती व्यक्त केली जात आहे.