Sangli Murder: एकाच वेळी तिघांची हत्या, तिहेरी हत्याकांडाने सांगली जिल्हा हादरला

सांगली जिल्ह्यातील दुधोंडी येथील वसंतनगरमध्ये धारधार शस्त्राने वार करुन एकाच वेळी तिघांची हत्या केल्याची अत्यंत खळबळजनक घटना घडली आहे. अरविंद साठे, विकास मोहिते, सनी मोहिते अशी हत्या झालेल्यांची नावे आहे. पूर्व वैमनस्यातून हे हत्याकांड करण्यात आले असल्याची प्राथमिक माहिती मिळते आहे. दरम्यान, हल्लेखोर फरार झाले आहेत.

या घटनेची माहिती मिळताच पोलीस घटनास्थळी दाखल झाले आहेत. मिळालेल्या माहितीनुसार, हत्या करण्यात आलेल्या एका व्यक्तीशी हल्लेखोरांचा एक जुना वाद होता. त्याप्रकरणी पूर्वीच गुन्हा दाखल करण्यात आला होता.

याच पूर्व वैमनस्यातून 1 ऑगस्ट रोजी रात्रीही वाद झाला होता. पोलिसांनी हा वाद मिटवला होता. मात्र, तरीही आज विजय मोहिते, हिम्मत मोहिते, किशोर मोहिते, आदित्य मोहिते, प्रवीण मोहिते, सचिन इनामदार यांनी येऊन अचानक हल्ला केला. या हल्ल्यात अरविंद साठे, विकास मोहिते, सनी मोहिते यांची निर्घृण हत्या करण्यात आली असून अन्य चार जण गंभीर जखमी झाले आहेत.