पॉपस्टार रिहानाने शेतकरी आंदोलनाला आपला पाठिंबादर्शवल्यानंतर आता परदेशातल्या अनेक सेलिब्रिटिज शेतकरी आंदोलनाला पाठिंबा देण्यासाठी पुढे आल्या आहेत. अमेरिकेतल्या सिटी ऑफ फ्रेस्नोच्या मेयरनेही या आंदोलनाला आपला पाठिंबा दर्शवला आहे. सगळ्यात महत्त्वाचं म्हणजे अमेरिकेची सर्वात मोठी फुटबॉल लीग मानल्या जाणा-या ‘सुपर बाउल फुटबॉल लीग’मध्ये भारतातल्या शेतकरी आंदोलनाची जाहिरात झळकलीय.
सुपर बाउल फुटबॉल लीगही अमेरिकेतली सर्वात मोठी नॅशनल फुटबॉल लीग आहे. 60 च्या दशकात ती ‘सुपर बाउल’ या नावाने ओळखली जाऊ लागली. सुपर बाउलचा प्लॅटफॉर्म जाहिरातींसाठी महत्त्वाचा मानला जातो कारण तिथे दरवर्षी जगातल्या काही सर्वात प्रसिद्ध जाहिराती लॉन्च केल्या जातात. मात्र या वर्षी तिथे इतर काही जाहिरातींबरोबरच भारतात सुरू असलेल्या शेतकरी आंदोलनाची जाहिरातही दाखवली गेली. ‘मानवी इतिहासातलं सर्वात मोठं आंदोलन’, असा उल्लेख या आंदोलनाचा या जाहिरातीत करण्यात आला आहे.
World is watching! Farmers add played at #SuperBowl #FarmerProtest #NoFarmersNoFood pic.twitter.com/583H2l3hax
— Jazzy B (@jazzyb) February 7, 2021
टम्पा बे बुकेनेर्स आणि कंसास सिटी चीफ्स यांच्यातला सामना सुरू असताना ही 30 सेकंदाची जाहिरात चालली. जाहिरातीची सुरूवात मार्टिन ल्युथर किंग ज्युनिअरच्या एका क्वोटने होते आणि भारतात सध्या सुरू असलेलं शेतकरी आंदोलन हे, ‘मानवी इतिहासातलं सर्वात मोठं आंदोलन’ असल्याचा उल्लेख त्यात येतो.
अमेरिकेत या सुपर बाउलमध्ये झळकणा-या जाहिरातींना वेगळं महत्त्व आहे कारण त्या बरेचदा स्पेशली सुपर बाउलमध्ये दाखवण्यासाठी तयार केल्या जातात. त्यात वापरलेलं कॅमेरा तंत्र, सिनेमॅटोग्राफी सगळ्याच बाबतीत त्या खूप उजव्या असतात असं मानलं जातं. आता राउटर्सच्या रिपोर्टनुसार टम्पा बे बुकेनेर्स आणि कंसास सिटी चीफ्स यांच्यातल्या ज्या सामन्यात ही जाहिरात झळकली तो सामना 10 कोटी लोकांनी पाहिला असल्याचा अंदाज आहे.
सुपर बाउलचा इतिहास पाहिला तर सुपर बाउलच्या मॅचेस या अमेरिकन टेलिव्हिजवर सर्वाधिक पाहिल्या जाणा-यांपैकी एक आहेत. 2015 साली तर फक्त अमेरिकेतल्या तब्बल 11 कोटी 44 लाख जनतेनं सुपर बाउल पाहिल्याचं सांगितलं जातं, त्यामुळे अशा स्पर्धेत जेव्हा एखादी जाहिरात दाखवली जाते, तेव्हा तिच्यावर झालेला खर्चही जास्त असतो. सुपर बाउल अँड.कॉमवरच्या माहितीनुसार यंदाच्या वर्षी सुपर बाउलमधल्या जाहिरातीची किंमत प्रत्येकी अंदाजे 55 लाख इतकी होती. शेतकरी आंदोलनाबरोबरच इथे अमेझॉन, चिपोटले, उबर इट्स यांच्याही जाहिराती झळकल्या.
आता प्रश्न असा निर्माण होतो की, मग अमेरिकेत झळकलेल्या जाहिरातीसाठीचा खर्च कोणी उचलला असेल? तर हा खर्च सेंट्रल व्हॅलीतल्या शीख कम्युनिटीकडून उचलला गेल्याची शक्यता व्यक्ती केली जातेय. शेतकरी आंदोलनाबद्दल जागृती निर्माण करण्यासाठी त्यांनी या निर्णय घेतला अशी शक्यता वर्तवली जातेय. अमेरिकेल्या सेंट्रल व्हॅलीमध्ये शीखांची संख्या जास्त आहे. त्यांच्या व्यतिरिक्त आता कॅनेडियन पंजाबी गायक जॅझी बी नेही आपलं समर्थन दर्शवलं आहे.
Happy to share that I’ve donated $10,000 to provide medical assistance to the farmers in need in India to help save lives during these times. I hope we can prevent any additional life from being lost. ?? #FarmersProtest https://t.co/0WoEw0l3ij
— JuJu Smith-Schuster (@TeamJuJu) February 3, 2021
शिवाय अमेरिकेचा फुटबॉल प्लेयर जुजू स्मिथ-शूस्टर यानेही या आंदोलनासाठी आपलं समर्थन दर्शवलं आहे. काइल कुज़्मा, बॅरन डेविस या बास्केटबॉल प्लेयरने, अभिनेता जॉन कुसॅक, कॉमेडियन हसन मिन्हाज या सगळ्या अमेरिकेल्या सेलिब्रिटिजनेही शेतकरी आंदोलनाला पाठिंबा दिलाय. त्यामुळे आता यामुळे या आंदोलनाला वेगळं वळण लागतं का?, हे पाहणं महत्त्वाचं असेल.
हा व्हिडिओ देखील पहा…
