हार्दिक पटेलांच्या हाती कमळ तरीही नेटकरी का म्हणत आहेत भूतकाळ पाठ सोडत नाही?

जाणून घ्या #HardikPatel या हॅशटॅगमध्ये लोक ही चर्चा का करत आहेत?
हार्दिक पटेलांच्या हाती कमळ तरीही नेटकरी का म्हणत आहेत भूतकाळ पाठ सोडत नाही?
Hardik Patel's BJP entry, but why are people saying on Twitter that the past will not leave you?

एकेकाळी गुजरातच्या पाटीदार आंदोलनाचा चेहरा असलेले हार्दिक पटेल यांनी व्हाया काँग्रेस आता अखेर भाजपमध्ये प्रवेश केला आहे. गुरूवारी दुपारी 12 वाजता त्यांनी भाजपमध्ये प्रवेश केला. 2015 मध्ये गुजरातमध्ये जे पाटीदार आंदोलन झालं होतं त्या आंदोलनाच्या वेळी जर कुणाला सांगितलं असतं की भविष्यात हार्दिक पटेल भाजपमध्ये जातील तर कुणीच विश्वास ठेवला नसता. मात्र राजकारणात काहीही शक्य असतं, हेच हार्दिक पटेल यांच्या कृतीने दाखवून दिलं आहे.

गुजरात विधानसभेच्या निवडणुका या वर्षीच होणार आहेत. त्या पार्श्वभूमीवर हार्दिक पटेल यांनी भाजपमध्ये प्रवेश करणं हे सूचक आहे. 2017 च्या विधानसभा निवडणुकीत हार्दिक पटेल, अल्पेश ठाकोर आणि जिग्नेश मेवाणी या तिघांना सोबत घेऊन काँग्रेसने भाजपला टक्कर देण्याचा प्रयत्न केला होता. मात्र आता परिस्थिती बदलली आहे.

हार्दिक पटेल यांनी स्वतःला आता भाजपचा सैनिक म्हटलं आहे. तसंच भाजप, नरेंद्र मोदी, अमित शाह यांच्या विरोधातले सगळे ट्विट डिलिट कऱण्याची खबरादारीही घेतली आहे. असं सगळं असलं तरीही हार्दिक पटेल यांचा भाजप प्रवेश हा नेटकऱ्यांना काही रूचलेला नाही. नेटकरी ट्विटरवर हार्दिक पटेल यांची शाळा घेतली आहे. भूतकाळ पाठ सोडत नाही असं म्हणत हार्दिक पटेल यांना नेटकऱ्यांनी का सुनावलं आहे आपण जाणून घेणार आहोत.

हार्दिक पटेल यांनी भाजपविरोधातली ट्विट डिलिट केली आहेत. मात्र त्याचे स्क्रिन शॉट वापरत नेटकऱ्यांनी त्यांना खडे बोल सुनावले आहेत.

रविराज सिंह जडेजा नावाचा ट्विटर युजरने हार्दिक पटेल यांच्या ट्विटचा स्क्रिनशॉट ट्विट केला आहे. ज्यात हार्दिक पटेल म्हणतात, जनताद्वारा चुने हुए प्रतिनिधी जनतासे द्रोह कर अपने स्वार्थ के लिए पार्टी बदलते है तब ऐसे स्वार्थी नेताओंको चौराहेपर खडा कर चप्पलोसे पिटना चाहिये. हार्दिक पटेल यांचं 2020 मधलं हे ट्विट आहे. ज्याची आठवण हार्दिक पटेल यांनी काँग्रेसमधून भाजपमध्ये प्रवेश केल्यावर पुन्हा समोर आलं आणि त्यातून हार्दिक पटेल यांना प्रश्न विचारण्यात आला आहे. रविराज यांच्या प्रमाणेच अनेकांनी हा स्क्रिनशॉट व्हायरल केला आहे.

अगर सुबह का देशद्रोही शाम को भाजपा में जुड जाए तोह उसे देशभक्त कहते हैं... या हार्दिक पटेल यांच्या जुन्या ट्विटची आठवणही विनीत पुनिया यांनी करून दिली आहे. तसंच मी हार्दिक पटेल यांच्या मताशी सहमत आहे असा खोचक टोलाही त्यांनी लगावला आहे.

सुष्मिता मझुमदार यांनीही हार्दिक पटेल यांना त्यांच्या जुन्या ट्विटची आठवण करून दिली आहे. त्यात ते म्हणतात, हार-जीत के कारण पाले व्यापारी बदलते है... विचारधारा के अनुयायी हीं. लडूँगा जितूगाँ और मरते दम तक काँग्रेसमें रहूँगा या सगळ्यानंतर आज जेव्हा हार्दिक पटेल यांनी भाजप प्रवेश केला तेव्हा सुष्मिता म्हणतात हा तर भारतीय जुमला पार्टीचा नवा मेंबर...

तर काही नेटकऱ्यांनी फनी व्हीडिओ पोस्ट करून हार्दिक पटेल यांची खिल्ली उडवली आहे.

अरमान भारतीय नावाच्या एका युजरने हार्दिक पटेल यांचं ते ट्विट केलं आहे ज्यात हार्दिक पटेल म्हणतात, भाजपामें सही लोगों का सम्मान नहीं किया जाता, जो अमित शाह के पैरो की जुती बनकर रहता है उनको आगे किया जाता है. हा स्क्रिन शॉट ट्विट करत अरमान भारतीय म्हणतात की तुझा भूतकाळ तुझी पाठ सोडणार नाही.

हार्दिक पटेल हे नाव राजकारणात सात वर्षांपूर्वी फारसं कुणालाही माहित नव्हतं. मात्र थेट मोदी आणि अमित शाह यांना आव्हान देत पाटीदार आंदोलन उभं करत हार्दिक पटेल हे नाव चर्चेत आलं. त्यानंतर ते नाव मोठंही झालं. हार्दिक पटेल चुकूनही भाजपच्या वाटेवर जाणार नाहीत असंच तेव्हा वाटत होतं आणि तेव्हा घडलंही तसंच. कुर्मी, पाटीदार तसंच गुर्जर या समुदायांचा समावेश ओबीसींमध्ये करावा आणि त्यांना सरकारी नोकरी दिली जावी या मागणीसाठी हार्दिक पटेली यांनी सप्टेंबर २०१५ मध्ये पटेल नवनिर्माण सेनाही स्थापन केली होती. त्याच वर्षी ऑक्टोबर महिन्यात हार्दिक पटेल यांच्या विरोधात राष्ट्रध्वजाचा अपमान करण्याचा आरोपही लावला गेला होता.

Hardik Patel joins BJP after quitting the Congress
Hardik Patel joins BJP after quitting the Congress

२०१७ मध्ये गुजरातमध्ये ज्या निवडणुका पार पडल्या त्या विधानसभा निवडणुकीत हार्दिक पटेल काय करणार याकडे सगळ्यांच्या नजरा लागल्या होत्या. अपेक्षेप्रमाणे हार्दिक पटेल कांग्रेस सोबत गेले. त्यांच्यासोबतच अल्पेश ठाकोर तसंच जिग्नेश मेवाणी यांच्या मदतीने कांग्रेस पूर्ण तयारीने मैदानात उतरला होता. या तिघांची भाजपला आव्हान देणारे नेते म्हणून राजकीय वर्तुळात चांगली चर्चा त्यावेळी रंगली होती.

2019 च्या भारतीय सार्वत्रिक निवडणुकीच्या प्रचारादरम्यान त्यांनी नेपाळमधील लोकांविरुद्ध टिप्पण्या केल्या ज्यांचे वर्णन विद्यमान पंतप्रधान नरेंद्र मोदी यांना लक्ष्य करताना वर्णद्वेषी म्हणून केले गेले. 11 जुलै 2020 रोजी त्यांची गुजरात प्रदेश काँग्रेस कमिटीचे कार्याध्यक्ष म्हणून नियुक्ती करण्यात आली. एवढंच नाही तर हार्दिक पटेल यांनी अमित शाह यांची तुलना जनरल डायरसोबतही केली होती. मात्र आता हेच हार्दिक पटेल मागचे सगळे ट्विट डिलिट करत भाजपवासी झाले आहेत.

हार्दिक पटेल यांचे मित्र अल्पेश ठाकोर यांनी आधीच भाजपमध्ये प्रवेश केला आहे. तर गुरूवारी भाजपचा झेंडा हार्दिक पटेल यांनी हाती घेतला आहे. असं सगळं असलं तरीही नेटकरी मात्र भूतकाळ तुमची पाठ सोडणार नाहीत असं म्हणत हार्दिक पटेल यांना त्यांच्या डिलिट केलेल्या ट्विट्सची आठवण करून देत आहेत.

Related Stories

No stories found.
Mumbai Tak
www.mumbaitak.in