डोंबिवली : शाळेच्या ट्रस्टीच्या मुलाची शिक्षिकेला अश्लील व्हिडीओ पाठवत शरीरसुखाची मागणी; मनसेने इंगा दाखवला

मनसेचे आंदोलन करताच आरोपी अटकेत 

मिळालेल्या सविस्तर माहितीनुसार, शाळेचे ट्रस्टी शिवा अय्यर यांचा मुलगा सरवना अय्यर हा गेल्या काही दिवसांपासून पीडित शिक्षिकेला वारंवार मोबाईलवर अश्लील मेसेज पाठवून त्रास देत होता. इतकेच नाही तर त्याने शिक्षिकेला अश्लील व्हिडिओ पाठवून तिच्याकडे अयोग्य शरीरसंबंधांची मागणी केल्याचा गंभीर आरोप करण्यात आला आहे. या सततच्या त्रासामुळे मानसिक दबावाखाली असलेल्या शिक्षिकेने अखेर आपल्या आईसह महाराष्ट्र नवनिर्माण सेनेच्या पदाधिकाऱ्यांकडे धाव घेऊन न्यायाची मागणी केली. मनसेचे नेते राहुल कामत, अरुण जांभळे आणि महिला पदाधिकारी कोमल पाटील यांनी कार्यकर्त्यांसह शाळेवर धडक दिली आणि आरोपीला तातडीने पोलिसांच्या स्वाधीन करण्याची मागणी केली. यावेळी शाळेत सुमारे तासभर मोठा गदारोळ आणि तणावाचे वातावरण निर्माण झाले होते, आंदोलकांनी घोषणाबाजी करत प्रशासनाचा निषेध केला.

हेही वाचा : अमरावती पोलीस आयुक्तालयात जवानानं स्वत:वर गोळीबार करत संपवलं जीवन, पोलीस दलात एकच खळबळ

पोलीस कारवाई आणि ट्रस्टीची भूमिका

घटनेचे गांभीर्य ओळखून मानपाडा पोलीस ठाण्याचे वरिष्ठ पोलीस निरीक्षक संदीपान शिंदे आपल्या फौजफाट्यासह तातडीने घटनास्थळी दाखल झाले. पोलिसांनी आंदोलकांना शांत केले आणि परिस्थितीवर नियंत्रण मिळवून शाळेत सुरक्षा व्यवस्था तैनात केली. पोलिसांनी शाळेचे ट्रस्टी शिवा अय्यर यांच्याशी संपर्क साधून त्यांच्या मुलाबाबत विचारणा केली असता, त्यांनी तपासात पूर्ण सहकार्य दर्शवले. ट्रस्टींनी स्वतः आपल्या मुलाला पोलिसांच्या स्वाधीन केले, ज्यानंतर पोलिसांनी सरवना अय्यर याला ताब्यात घेऊन पोलीस ठाण्यात नेले. पोलिसांनी या प्रकरणातील तांत्रिक पुरावे गोळा करण्यासाठी संबंधित मोबाईल आणि त्यातील चॅट्स तपासण्याचे काम सुरू केले असून, पीडित शिक्षिकेचा सविस्तर जबाब नोंदवून योग्य त्या कलमान्वये गुन्हा दाखल करण्याची प्रक्रिया राबवली जात आहे.

या धक्कादायक घटनेवर प्रतिक्रिया देताना ट्रस्टी शिवा अय्यर यांनी स्पष्ट केले की, कायदा सर्वांसाठी समान असून जर त्यांचा मुलगा दोषी आढळला तर त्याच्यावर कायद्यानुसार कठोर कारवाई व्हावी, अशीच त्यांची इच्छा आहे. या घटनेने शैक्षणिक वर्तुळात मोठी खळबळ उडाली असून शाळांमधील महिला कर्मचाऱ्यांच्या सुरक्षेचा प्रश्न पुन्हा ऐरणीवर आला आहे. शाळेतील इतर कर्मचारी आणि शिक्षिकांनी देखील या निंदनीय प्रकाराचा निषेध केला असून अशा विकृत प्रवृत्तींना आळा घालण्यासाठी प्रशासनाने कठोर पावले उचलावीत, अशी मागणी केली आहे. सध्या मानपाडा पोलीस या प्रकरणाचा सखोल तपास करत असून, यापूर्वीही आरोपीने अशा प्रकारे कोणाला त्रास दिला होता का, याचीही पडताळणी केली जात आहे.

इतर महत्त्वाच्या बातम्या 

अमरावती पोलीस आयुक्तालयात जवानानं स्वत:वर गोळीबार करत संपवलं जीवन, पोलीस दलात एकच खळबळ