मुंबईची खबर: 'ती' महिला कोण? म्हाडाची अधिकारी सांगून केला भलताच कांड!

आरोपी महिलेचं नाव बेला डिसूझा असून तिने महाराष्ट्र गृहनिर्माण आणि क्षेत्र विकास प्राधिकरणातील वरिष्ठ अधिकारी असल्याचे लोकांना भासवले. तसेच, जोगेश्वरी, गोरेगाव, माहीम आणि वांद्रे अशा प्रतिष्ठित शहरांमध्ये स्वस्त दरात फ्लॅट्स मिळवून देण्याचे आश्वासन दिले होते.

पोलिसांनी या प्रकरणातील आणखी तीन आरोपींची ओळख पटवली आहे. केदार साटम, जितेंद्र राठोड आणि गिरीश राव अशी आरोपींची नावं असून ते सध्या फरार आहेत. या तिघांसोबत त्या महिलेवरही फसवणूक आणि गुन्हेगारी विश्वासघाताचा गुन्हा दाखल करण्यात आला आहे.

कशी केली कोटींची फसवणूक?

लोकमत टाईम्सच्या वृत्तानुसार, तक्रारदार रोहित चांदगोठिया हा मालाड येथील एक व्यापारी आहे. रॉकी अग्रवाल या त्याच्या ओळखीच्या व्यक्तीच्या माध्यमातून रोहितची ओळख या स्वस्त दरात फ्लॅट्स मिळवून देणाऱ्या ग्रुपसोबत झाली. त्यावेळी पीडित व्यक्तीला केदार साटमने सुरुवातीला ओशिवरा येथे फ्लॅट मिळवून देणार असल्याचा दावा केला आणि नंतर त्याची ओळख बेला डिसूझाशी करून दिली, त्यावेळी बेलाची म्हाडाची वरिष्ठ अधिकारी अशी खोटी ओळख करुन देण्यात आली. चांदगोठिया यांना दादरमध्ये 80 लाख रुपयांना फ्लॅट देण्यात आला होता आणि तक्रारदाराने शेवटी 72 लाख रुपये रोख दिले. ही रक्कम जितेंद्र राठोड यांनी घेतल्याचा आरोप करण्यात आला आहे. त्यावेळी त्यांना रक्कम दिल्याची पावती देण्यात आली मात्र फ्लॅट कधीच दाखवण्यात आला नसल्याचा देखील आरोप करण्यात आला आहे. 

हे ही वाचा: महिला डॉक्टरचे AI जनरेटेड अश्लील व्हिडिओ, नेमकं हॉस्पिटलमध्ये घडलं काय?

या गटाने रॉकी अग्रवालसोबत काम करणाऱ्या रामकेवल यादवला गोरेगावमधील SRA फ्लॅटसाठी 25 लाख रुपये देण्यासाठी तयार केले. नंतर बेलाने अग्रवालला वांद्रे आणि माहीममधील सहा फ्लॅटच्या बुकिंग आणि स्टॅम्प ड्युटीसाठी 25 लाख रुपये गुंतवण्यास तयार केले. यासोबतच भविष्यात रकमेचा परतावा मिळण्याचे आश्वासनही देण्यात आले होते. मार्च 2022 ते मार्च 2025 दरम्यान गुंतवणूकदारांकडून पेमेन्ट्स करण्यात आले. वारंवार पाठपुरावा करूनही वचन दिलेले एकही फ्लॅट देण्यात आले नाही. त्यामुळे संशय वाढत गेला. यादरम्यान आरोपी लोकांशी संपर्क टाळू लागला आणि शेवटी गायब झाला. 

फसवणूक करणाऱ्यांच्या विरोधात तक्रार दाखल 

तक्रारींनंतर, चौघांविरुद्ध दिंडोशी पोलिस ठाण्यात FIR दाखल करण्यात आली. तपासादरम्यान, पोलिसांनी बेला डिसोझा यांचा माग काढून त्यांना अटक केली. मात्र उर्वरित तीन आरोपी फरार आहेत आणि त्यांना शोधण्यासाठी पोलिसांचे प्रयत्न सुरु आहेत.

हे ही वाचा: लग्नानंतर नवऱ्याला जवळही येऊ दिलं नाही; सोनमने असं का केलं? म्हणाली, "कामाख्या देवीच्या दर्शनानंतर..."

या ग्रुपने अशाच योजनांचा वापर करून इतर व्यक्तींनाही फसवलं असल्याचा पोलीस संशय व्यक्त करत आहेत. पोलीस आता अतिरिक्त तक्रारी आणि कागदपत्रांचा तपास करत आहेत. आरोपींनी पीडितांचा विश्वास संपादन करण्यासाठी प्रत्यक्ष गृहनिर्माण योजना किंवा अधिकाऱ्यांच्या नावांचा वापर केला होता का? याचीही पडताळणी अधिकारी करत आहेत.