बीड : पत्नीचा ह्रदयविकाराने मृत्यू, गावाकडे अंत्यसंस्काराची तयारी, पण पोलिसांना शंका आल्याने भयंकर कांड उघडकीस

सूत्रांनी दिलेल्या माहितीनुसार, सुरेश शेरफुले हा हातोला येथील एका शेतकऱ्याच्या शेतात सालगडी म्हणून पत्नीसह राहत होता. मागील 3-4 दिवसांपासून तो गावाकडे जाऊ म्हणून पत्नीकडे आग्रह धरत होता, पण ती तयार नव्हती. याच कारणावरून शुक्रवारी, 23 जानेवारी रोजी दोघांत तीव्र वाद झाला असल्याची चर्चा आहे. रागाच्या भरात सुरेशने जाड भरीव काठीने शीलाबाईच्या डोक्यात एकामागून एक अनेक वार केले. या हल्ल्यात शीलाबाई रक्ताच्या थारोळ्यात कोसळल्या आणि त्यांचा जागीच मृत्यू झाला. त्यानंतर सुरेशने हा खून पचवण्यासाठी परिसरातील लोकांना आणि गावाकडे नातेवाईकांना शीलाबाईचा हृदयविकाराने मृत्यू झाल्याचे खोटे सांगितले.

हेही वाचा : अखेर दोन्ही शिवसेना एकत्र, भाजपला रोखण्यासाठी ठाकरेंच्या सोलापुरातील आमदाराची खेळी; राष्ट्रवादीलाही सोबत घेतलं

गुन्हा लपवण्यासाठी सुरेशने तातडीने एक क्रुझर गाडी भाड्याने केली आणि मृतदेह घेऊन थेट देगलूर तालुक्यातील आलुरा गाठले. मात्र, बर्दापूर पोलिसांना या संशयास्पद मृत्यूची गुप्त माहिती मिळाली. बर्दापूर पोलीस ठाण्याचे सहायक पोलीस निरीक्षक कांबळे यांनी वेळ न घालवता देगलूर पोलिसांशी संपर्क साधला. देगलूरचे पोलीस उपनिरीक्षक गोपाळ सूर्यवंशी यांनी तातडीने आलुरा गाव गाठले. तिथे शीलाबाईच्या माहेरच्या लोकांनाही डोक्यावरील जखमा पाहून संशय आला होता. पोलिसांनी अंत्यसंस्कारापूर्वीच मृतदेह ताब्यात घेऊन पती सुरेशला ताब्यात घेतले.

सध्या संशयित आरोपी असलेला पती बर्दापूर पोलिसांच्या ताब्यात असून मृतदेह शवविच्छेदनासाठी स्वाराती रुग्णालयात पाठवण्यात आला आहे. गुन्हा नोंदविण्याची प्रक्रिया सुरु असून त्यानंतर या गुन्ह्यात आणखी काही आरोपी सामील आहेत का हे समजू शकेल. अद्याप या घटनेमागचे रान स्पष्ट होऊ शकलेले नाही. या घटनेचा अधिक तपास बर्दापूर पोलीस करत आहेत.

इतर महत्त्वाच्या बातम्या 

आमदार दौलत दरोडा यांच्या पुतण्याचा तुरुंगात ह्रदयविकाराने मृत्यू, कोट्यावधींच्या तांदुळ घोटाळ्यात भोगत होता तुरुंगवास