बीड हादरलं, पत्नीचे आक्षेपार्ह फोटो, मित्रांनीच मित्राला धारदार शस्त्रांनी संपवलं, होमगार्डही हत्याकांडात सामील

हॅलिपॅडच्या मोकळ्या जागेत रचला मृत्यूचा सापळा

ही घटना 26 एप्रिल रोजी रात्री साडेसात ते साडेआठ वाजेच्या दरम्यान घडली. फिर्यादी शहादेव आश्राजी गवते हे आपल्या नातेवाईकासह मोटारसायकलवरून जात असताना, त्यांना नारायणगडाच्या दक्षिण बाजूला असलेल्या हॅलिपॅडच्या मोकळ्या जागेत ओरडण्याचा आणि शिवीगाळ करण्याचा आवाज आला. त्यांनी मोटारसायकलच्या लाईटच्या उजेडात पाहिले असता, तीन लोकांनी सुमितला घट्ट पकडून ठेवले होते आणि चौथा आरोपी त्याला चाकूने भोकसत होता. फिर्यादी जवळ जाईपर्यंत आरोपींनी सुमितवर जीवघेणा हल्ला केला होता. सुमित रक्ताच्या थारोळ्यात जमिनीवर कोसळल्यानंतर आरोपींनी तिथून पळ काढण्याचा प्रयत्न केला, मात्र नागरिकांनी पाठलाग करून एका आरोपीला जागीच पकडले.

पत्नीचा फोटो आणि जुना वाद ठरला हत्येचे कारण

या प्रकरणी पोलिसांनी दिलेल्या माहितीनुसार, आरोपी रुस्तुम गोवर्धन गवते याच्या पत्नीचे काही आक्षेपार्ह फोटो सुमितने दाखविल्याचा संशय आरोपींना होता. याच कारणावरून त्यांच्यामध्ये मागील काही दिवसांपासून वारंवार वाद होत होते. या वादाचा वचपा काढण्यासाठी रितेश सतीश बहिर, रुस्तुम गोवर्धन गवते, ज्ञानेश्वर दत्ता लाटे आणि सूरज मच्छिंद्र नागरगोजे यांनी जाणीवपूर्वक कट रचला. फिर्यादीनुसार, रुस्तुम, ज्ञानेश्वर आणि सूरज यांनी सुमितचे हातपाय पकडून ठेवले होते, तर रितेश बहिर याने त्याच्या हातातील धारदार चाकूने सुमितच्या पोटात वार केले. जास्त रक्तस्त्राव झाल्यामुळे आणि मदतीसाठी वाहन न मिळाल्याने सुमितचा घटनास्थळीच मृत्यू झाला.

होमगार्डचा गुन्ह्यात सहभाग; शिरूर पोलीस ठाण्यात गुन्हा दाखल

या घटनेची माहिती मिळताच शिरूर कासार पोलीस तातडीने घटनास्थळी दाखल झाले. ग्रामस्थांनी पकडून ठेवलेला आरोपी ज्ञानेश्वर लाटे याला पोलिसांच्या ताब्यात देण्यात आले आहे. आरोपीने पोलिसांकडे गुन्ह्याची कबुली दिली असून, रुस्तुमच्या पत्नीच्या फोटोंवरून हा सर्व प्रकार घडल्याचे सांगितले. याप्रकरणी शहादेव गवते यांच्या फिर्यादीवरून शिरूर पोलीस ठाण्यात चारही आरोपींविरुद्ध हत्येचा गुन्हा दाखल करण्यात आला आहे. कायद्याचे रक्षक असलेल्या होमगार्डनेच अशा प्रकारे क्रूर हत्या केल्यामुळे पोलिसांच्या प्रतिमेवर प्रश्नचिन्ह उपस्थित केले जात आहे. सध्या पोलीस फरार आरोपींचा शोध घेत असून, या घटनेमुळे बेलुरा गावात तणावपूर्ण शांतता पसरली आहे.

इतर महत्त्वाच्या बातम्या 

'मिसिंग लिंक'चा मुहूर्त ठरला, टोलच्या दरवाढीबाबत महत्त्वाची माहिती, एकनाथ शिंदेंनी केली पाहणी