मर्सिडिजपेक्षा महागडा घोडा, 15 कोटींच्या 'ब्रम्होस'ची चर्चा! रोज 15 लिटर दूध अन् पौष्टिक खुराक

गुजरातच्या नागेश देसाई यांच्या देसाई स्टडफॉर्मवर पाळलेला हा घोडा आधीपासूनच देशभरात चर्चेत आहे. काळ्या रंगाचा, 63 इंच उंच आणि केवळ 36 महिन्यांचा हा मारवाडी जातीचा घोडा आपल्या उठावदार ठेवणीसाठी ओळखला जातो. कपाळावरचा आकर्षक पांढरा पट्टा आणि मादक चाल यामुळे तो सर्वांमध्ये उठून दिसतो. पुष्कर बाजारात या घोड्याला 8 कोटी रुपयांपर्यंत बोली लागली होती. मात्र, देसाई कुटुंबाने स्पष्ट सांगितले आहे की, 15 कोटी रुपयांची ऑफर आली तरीही ब्रम्होस विक्रीसाठी नाही.

हेही वाचा : नाशिक : पत्नीचं अफेअर असल्याचा संशय, पतीने बुटाच्या लेसने गळा आवळला; जागेवर संपवलं

दिवसभर विशेष काळजी, तब्येतीवर मोठा खर्च आणि तज्ज्ञांची निगा—हीच ब्रम्होसची खास जडणघडण. या घोड्याला दिवसभरात तब्बल 15 लिटर दूध, याशिवाय अश्वतज्ज्ञांच्या मार्गदर्शनाखाली उच्च प्रतीचे पौष्टिक खाद्य दिले जाते. याच्या रोजच्या देखभालीसाठी स्वतंत्र मजूर, मसाज आणि ग्रुमिंगचीही विशेष सोय असते. त्यामुळेच देशातील विविध अश्वस्पर्धांमध्ये ब्रम्होस सातत्याने पहिल्या क्रमांकावर आला आहे.

देसाई कुटुंबाचा दावा आहे की, ब्रम्होस हा केवळ घोडा नसून एक अनमोल नैसर्गिक संपत्ती आहे. स्टडफॉर्मवर आतापर्यंत ब्रम्होसच्या ब्रेडिंगमधून 10 पिलं तयार झाली असून, त्यांना आधीच लाखोंच्या बोली लागल्या आहेत. अनेक घोड्यांच्या मालकांप्रमाणे विक्रीचा मोह न ठेवता देसाई कुटुंबाने ब्रम्होसला फक्त भविष्यातील ब्रीडिंगसाठीच वापरण्याचा निर्णय घेतला आहे.

सारंगखेडा घोडेबाजारात यंदा दाखल झालेल्या असंख्य घोड्यांमध्ये ब्रम्होस सर्वाधिक चमकला. त्याचा भरदार आकार, नैसर्गिक सौंदर्य, उच्चवंशीय पार्श्वभूमी आणि आकाशाला भिडणारी किंमत—या सर्व घटकांमुळे प्रेक्षकच नव्हे तर अनुभवी घोडेपालकही त्याच्याकडे आकर्षित झाले. चेतक फेस्टिव्हलचे अध्यक्ष जयपाल रावल यांनीही याला या वर्षीचा सर्वात देखणा आणि आकर्षक घोडा म्हणून गौरवले.

सारंगखेड्याच्या ऐतिहासिक घोडेबाजारात अनेक प्रतिष्ठित घोडे दरवर्षी दाखल होतात, परंतु 15 कोटींच्या चर्चेत असलेल्या ब्रम्होसने मात्र या वर्षीची खरी ‘हायलाइट’ बनून आपली वेगळी छाप पाडली आहे.

इतर महत्त्वाच्या बातम्या 

लातूरकरांवर शोककळा, माजी केंद्रीय गृहमंत्री शिवराज पाटील चाकूरकर यांचे निधन, वयाच्या 90 व्या वर्षी घेतला अखेरचा श्वास