धाराशिव : काकाने पुतणीला गळा दाबून संपवलं, कोयत्याने तुकडे करुन मृतदेह चारीमध्ये पुरला, हत्येचं कारणही समोर

महादेव माने (रा. गवळेवाडी) यांनी (दिनांक 28 फेब्रुवारी 2026 रोजी) आपल्या 13 महिन्यांच्या मुलीला अज्ञात व्यक्तीने घरातून पळवून नेल्याची तक्रार तामलवाडी पोलीस ठाण्यात दाखल केली होती. त्यानुसार गुन्हा रजिस्टर नं. 29/2026 अंतर्गत भारतीय न्याय संहिता (BNS) कलम 137(2) प्रमाणे गुन्हा दाखल करण्यात आला. सदर प्रकरणाचा तपास सहायक पोलीस निरीक्षक गोकुळ ठाकूर करीत असताना गुप्त माहितीच्या आधारे मुलीचा चुलता शंकररेश्वर माने याच्यावर संशय व्यक्त करण्यात आला. पोलिसांनी त्याला ताब्यात घेऊन कसून चौकशी केली असता त्याने गुन्ह्याची कबुली दिली.

हेही वाचा : मुलाच्या डोक्यात हातोड्याने ठोकला अडीच इंचाचा लोखंडी खिळा, वडील अन् भावाचं कृत्य; मुलाचं काय झालं?

चौकशीत आरोपीने दिलेल्या माहितीनुसार, 27 फेब्रुवारी रोजी पहाटे 5 ते 5.30 वाजण्याच्या सुमारास त्याने चिमुकलीला घरातून उचलून नेले. शेतात नेऊन तिचा गळा दाबून खून केला. त्यानंतर कोयत्याच्या सहाय्याने मृतदेहाचे तुकडे करून पोत्यात भरले व जवळील चारीमध्ये पुरून टाकल्याची कबुली त्याने दिली. आरोपीने दाखवून दिलेल्या ठिकाणी दोन पंचांच्या उपस्थितीत पंचनामा करून मृतदेह ताब्यात घेण्यात आला असून पुढील कायदेशीर प्रक्रिया सुरू आहे.

प्राथमिक तपासात आरोपीच्या भावाच्या पत्नीचे कथित अनैतिक संबंध असल्याच्या संशयातून त्याच्या मनात संताप निर्माण झाला होता. तसेच पीडित मुलगी आपल्या भावाची नसल्याचा संशय आल्याने रागाच्या भरात त्याने हे अमानुष कृत्य केल्याचे पोलिस तपासात समोर आले आहे.

हा गुन्हा पोलीस अधीक्षक रितू खोखर, अप्पर पोलीस अधीक्षक शफाकत आमना व उपविभागीय पोलीस अधिकारी डॉ. निलेश देशमुख यांच्या मार्गदर्शनाखाली सहायक पोलीस निरीक्षक गोकुळ ठाकूर व त्यांच्या पथकाने अवघ्या 24 तासांत उलगडला. या पथकात पोलीस हवालदार जुबेर काझी, आकाश सुरनर, नितीन भोसले तसेच पोलीस अंमलदार सूरज नरवडे, नझीर बागवान, उमेश माने, तुराब शेख व मनोज गोबाडे यांचा समावेश होता.

इतर महत्त्वाच्या बातम्या 

41 वर्षीय मालकीणीवर लैंगिक अत्याचार, 'त्या' एका कारणाने तरुण घ्यायचा गैरफायदा, अखेर रंगेहाथ पकडले