धाराशिव : तहसीलदाराची गाडी अडवून तक्रारदाराचा तुफान राडा, दोघांवर गुन्हा दाखल VIDEO

शासकीय कामात अडथळा आणि तहसीलदारांची पोलिसांत फिर्याद

या प्रकरणाची सविस्तर पार्श्वभूमी अशी की, 15 एप्रिल रोजी सायंकाळी साडेसहाच्या सुमारास तहसीलदार निलेश काकडे यांना चांदणी नदी परिसरात वाळूचे अवैध उत्खनन सुरू असल्याची गुप्त माहिती मिळाली होती. या माहितीची शहानिशा करण्यासाठी ते आपल्या सहकाऱ्यांसह शासकीय वाहनातून निघाले होते. मात्र, तहसील कार्यालयाच्या गेटवरच योगेश मेटकरी याने गाडी अडवून तहसीलदारांशी हुज्जत घालण्यास सुरुवात केली. त्याने गाडीच्या काचांवर हाताने मारत गोंधळ घातला आणि जुन्या तक्रारींवर तातडीने कारवाई करण्याची मागणी केली. तहसीलदारांनी चौकशी सुरू असल्याचे वारंवार सांगूनही आरोपीने ऐकले नाही आणि थेट जीवे मारण्याची धमकी दिली. या प्रकारामुळे तहसीलदारांना आपली कारवाई थांबवून पोलीस ठाणे गाठावे लागले. पोलिसांनी दिलेल्या माहितीनुसार, या घटनेबाबत तहसीलदारांच्या फिर्यादीवरून योगेश मेटकरी आणि त्याच्या साथीदारावर शासकीय कामात अडथळा आणल्याप्रकरणी आणि धमकी दिल्याप्रकरणी गुन्हा दाखल करण्यात आला आहे.

हेही वाचा : प्रेम प्रकरणातून मामाच्या मुलाने आत्याच्या मुलीचा केला खून, नंतर स्वत: रेल्वेखाली उडी मारत संपवलं जीवन

महसूल विभागाचे काम बंद आंदोलन आणि बेमुदत उपोषणाचा इशारा

तहसीलदारांसारख्या जबाबदार अधिकाऱ्याला कार्यालयाच्या आवारातच अशा प्रकारे धमकी मिळाल्याने संपूर्ण महसूल विभाग प्रचंड आक्रमक झाला आहे. महसूल कर्मचारी संघटनेने या घटनेचा तीव्र निषेध करत तातडीने काम बंद आंदोलन पुकारले आहे. जोपर्यंत संबंधित आरोपींना अटक केली जात नाही आणि त्यांच्यावर एमपीडीए (MPDA) कायद्यांतर्गत कठोर कारवाई होत नाही, तोपर्यंत काम सुरू करणार नसल्याची भूमिका कर्मचाऱ्यांनी घेतली आहे. तहसीलदारांच्या सुरक्षिततेचा प्रश्न ऐरणीवर आला असून, भर दिवसा आणि शासकीय कार्यालयात अशी घटना घडणे हे प्रशासनाचे मनोधैर्य खच्ची करणारे असल्याचे महसूल अधिकाऱ्यांचे म्हणणे आहे. या आंदोलनामुळे परंडा तहसील कार्यालयाचे कामकाज पूर्णपणे विस्कळीत झाले असून, नागरिकांची कामे खोळंबली आहेत. जर तातडीने कारवाई झाली नाही, तर हे आंदोलन संपूर्ण जिल्हाभर पसरवण्याचा इशाराही संघटनेने दिला आहे.

परांडा पोलिसांनी या घटनेची गांभीर्यपूर्वक दखल घेतली असून सीसीटीव्ही फुटेज आणि व्हायरल झालेल्या व्हिडिओच्या आधारे तपास सुरू केला आहे. पोलिसांनी आरोपी योगेश मेटकरी याच्यावर विविध कलमान्वये गुन्हा नोंदवला असून त्याचा शोध घेण्यासाठी पथके तैनात केली आहेत. महसूल विभागाने दिलेल्या माहितीनुसार, अवैध वाळू माफियांचे धाबे दणाणले असल्याने प्रशासकीय अधिकाऱ्यांवर दबाव आणण्यासाठी अशा प्रकारचे प्रकार केले जात आहेत. पोलिसांनी याप्रकरणी सखोल चौकशी करून अहवाल सादर करण्याचे आश्वासन दिले असून, सध्या तहसील कार्यालय परिसरात तणावपूर्ण शांतता आहे. या घटनेमुळे शासकीय कर्मचाऱ्यांच्या सुरक्षिततेचा मुद्दा पुन्हा एकदा चर्चेत आला असून, वरिष्ठ पातळीवरून यावर काय तोडगा निघतो याकडे सर्वांचे लक्ष लागले आहे. प्रशासनाने स्पष्ट केले आहे की, कोणत्याही दबावाला बळी न पडता अवैध वाळू उपशाविरोधातील मोहीम अधिक तीव्र केली जाईल.

इतर महत्त्वाच्या बातम्या 

प्रेम प्रकरणातून मामाच्या मुलाने आत्याच्या मुलीचा केला खून, नंतर स्वत: रेल्वेखाली उडी मारत संपवलं जीवन