IIT बॉम्बेतील साहिल वाकोडे प्रकरणाला नवं वळण! परीक्षेदरम्यान मोबाईल वापरताना CCTV मध्ये दिसला साहिल

परीक्षा हॉलमधील CCTV फुटेज समोर आल्याचा दावा

IIT बॉम्बेतील विद्यार्थी साहिल वाकोडे याच्या आत्महत्येच्या प्रकरणात परीक्षा केंद्रातील CCTV फुटेज समोर आल्याचे वृत्त आहे. ‘आज तक’च्या वृत्तानुसार, या फुटेजमध्ये घटनेच्या काही वेळ आधी परीक्षा हॉलमध्ये काय घडले, याची दृश्ये असल्याचा दावा करण्यात आला आहे.

हे ही वाचा>> 'हे इतकं विषारी होत चाललंय..', साहिल वाकोडे आत्महत्या प्रकरणावर राज ठाकरेंची पोस्ट

परीक्षा सुरू असताना साहिल मोबाईलचा वापर करत असल्याचे या फुटेजमध्ये दिसत असल्याची माहिती आहे. प्रश्नपत्रिका आर्टिफिशियल इंटेलिजन्स टूल ChatGPT वर अपलोड करून उत्तरे मिळवण्याचा प्रयत्न केल्याचा आरोपही या प्रकरणात करण्यात आला आहे.

प्राध्यापकांनी मोबाईल पाहिला, विद्यार्थ्याला बाहेर नेलं

या प्रकरणातील आरोपांनुसार, परीक्षा हॉलमध्ये ड्युटीवर असलेले प्राध्यापक सूर्य नारायण डुल्ला यांचे साहिलकडे लक्ष गेले. त्यानंतर ते साहिलजवळ गेले आणि त्याचा मोबाईल पाहिल्यानंतर त्याला जागेवरून उठण्यास सांगितले.

CCTV फुटेजच्या अंतिम भागात प्राध्यापक डुल्ला हे साहिलला परीक्षा हॉलच्या बाहेर घेऊन जात असल्याचे दिसत असल्याचा दावा करण्यात आला आहे. मात्र, केवळ या दृश्यांवरून हॉलच्या बाहेर नेल्यानंतर नेमकं काय घडलं, याबाबत निष्कर्ष काढता येत नाही.

घटनेनंतर साहिलचा मृत्यू; प्राध्यापकांविरोधात गुन्हा

परीक्षा केंद्रातील या कथित घटनेनंतर काही वेळातच साहिलचा मृतदेह त्याच्या खोलीत आढळल्याची माहिती आहे. या प्रकरणात मुंबई पोलिसांनी प्राध्यापक सूर्य नारायण डुल्ला यांच्याविरोधात आत्महत्येस प्रवृत्त केल्याचा आरोप आणि अनुसूचित जाती-जमाती अत्याचार प्रतिबंधक कायद्यांतर्गत गुन्हा दाखल केला आहे. या प्रकरणाचा तपास मुंबई पोलिसांच्या क्राइम ब्रँचकडे सोपवण्यात आल्याची माहिती आहे.

हे ही वाचा>> 'मुलाला वापरले जातीवरून नको ते शब्द, 'त्या' दोन प्राध्यापकांना...'. साहिल वाकोडेच्या वडिलांचे गंभीर आरोप

साहिलच्या कुटुंबीयांचे गंभीर आरोप

साहिलच्या कुटुंबीयांनी प्राध्यापकांवर जातीय टिप्पणी करणे, मानसिक त्रास देणे आणि धमकी देणे असे गंभीर आरोप केले आहेत. परीक्षा हॉलमधून बाहेर नेल्यानंतर साहिलचा अपमान आणि छळ करण्यात आल्याचा दावाही कुटुंबीयांनी केला आहे.

दुसरीकडे, संस्थेच्या प्रशासनाच्या म्हणण्यानुसार, परीक्षेदरम्यान मोबाईल वापरल्याबद्दल विद्यार्थ्याला नियमांची माहिती देण्यात आली आणि समुपदेशन करण्यात आले होते.

अशा प्रकारे, संस्थेच्या प्रशासनाची भूमिका आणि साहिलच्या कुटुंबीयांनी केलेले आरोप यांच्यात फरक आहे. या आरोपांची सत्यता तपासातून स्पष्ट होणे अपेक्षित आहे.