जालना : गोंदेगाव येथील खून प्रकरणाचा 8 तासांत उलगडा; दोन आरोपी जेरबंद; नेमकं काय घडलं?

 सिंदखेडराजा येथून दोन आरोपी जेरबंद; दारूच्या नशेत झाला होता वाद

तपासादरम्यान पोलीस पथकाला गुप्त बातमीदाराकडून महत्त्वपूर्ण माहिती मिळाली की, या प्रकरणातील संशयित आरोपी विनोद गोपीनाथ कुटे (वय 27) आणि सोमीनाथ प्रकाश गिते (वय 27) हे बुलढाणा जिल्ह्यातील सिंदखेडराजा येथे लपून बसले आहेत. या माहितीच्या आधारे पोलिसांनी तत्काळ सिंदखेडराजा येथे धाव घेऊन दोघांनाही ताब्यात घेतले. पोलिसांनी केलेल्या सखोल चौकशीत आरोपींनी आपला गुन्हा कबूल केला आहे. आरोपींनी दिलेल्या माहितीनुसार, 26 एप्रिलच्या रात्री तिघेही एकत्र बसून दारू पीत होते. दारूच्या नशेत असतानाच त्यांच्यात किरकोळ कारणावरून वादाची ठिणगी पडली आणि त्याचे रूपांतर एका भीषण हत्याकांडात झाले.

हेही वाचा : 'भाजपचं जिल्हा उपाध्यक्ष व्हायचं असेल तर माझ्यासोबत चल..', जिल्हाध्यक्षाने शरीरसुखाची मागणी केल्याचा आरोप

 आईबद्दलचे अश्लील शब्द आणि चापट मारल्याचा राग ठरला जीवघेणा

आरोपी विनोद कुटे याने पोलिसांना सांगितले की, दारू पिताना मच्छिंद्र दराडे यांनी विनोदच्या आईबद्दल अत्यंत अश्लील शब्द वापरले आणि तिला अर्वाच्च भाषेत शिवीगाळ केली. एवढ्यावरच न थांबता मच्छिंद्र यांनी विनोदला सर्वांसमोर चापटही मारली होती. आपल्या आईचा झालेला अपमान आणि मिळालेली वागणूक यामुळे विनोदच्या मनात तीव्र राग निर्माण झाला होता. याच संतापाच्या भरात विनोद आणि त्याचा मित्र सोमीनाथ गिते या दोघांनी संगनमत करून मच्छिंद्र दराडे यांना शेतात गाठले आणि दगडाने त्यांचे डोके ठेचून त्यांची हत्या केली. या घटनेनंतर आरोपींनी पुराव्यांची विल्हेवाट लावण्याचा प्रयत्न केला आणि तिथून पळ काढला.

 मुद्देमाल जप्त आणि पोलिसांकडून पुढील कायदेशीर कारवाई सुरू

पोलिसांनी आरोपींकडून गुन्ह्यात वापरलेली मोटारसायकल आणि दोन मोबाईल फोन असा ऐवज जप्त केला आहे. आईला शिवीगाळ केल्याचा राग किती टोकाला जाऊ शकतो, याचे विदारक दर्शन या घटनेतून घडले आहे. अवघ्या 8 तासांत आरोपींच्या मुसक्या आवळल्यामुळे पोलीस दलाचे कौतुक होत आहे. सध्या दोन्ही आरोपींना जालना तालुका पोलिसांच्या स्वाधीन करण्यात आले असून त्यांना न्यायालयासमोर हजर करण्याची प्रक्रिया सुरू आहे. या घटनेमुळे गोंदेगाव परिसरात शोककळा पसरली असून नातेवाईकानेच नातेवाईकाचा खून केल्याने सर्वत्र हळहळ व्यक्त केली जात आहे. पोलीस या प्रकरणाचा अधिक तपास करत असून घटनेच्या वेळी आणखी कोणाचा सहभाग होता का, याचीही पडताळणी केली जात आहे.

इतर महत्त्वाच्या बातम्या 

बँकेतील कर्मचाऱ्यांना सांगून थकला, शेवटी 20 हजारांसाठी बहिणीचा सांगाडा घेऊन पोहोचला बँकेत; नेमकं काय घडलं?