तीव्र दुष्काळ असलेल्या भागांना दिलासा मिळणार? अंदाज काय?

हेही वाचा : ठाणे हादरलं, ठाकरे गटाच्या विभागप्रमुखांची गोळ्या झाडून हत्या, प्रदीप पुर्णेकरांना क्रूरपणे संपवलं

कोणत्या जिल्ह्यात किती टक्के पाऊस झाला? 

मराठवाड्यातील अनेक जिल्ह्यांमध्ये सरासरीपेक्षा मोठ्या प्रमाणात कमी पाऊस झाला आहे. बीडमध्ये सरासरीपेक्षा 52 टक्के कमी, हिंगोलीत 48 ते 49 टक्के कमी आणि परभणीत 40 टक्के कमी पाऊस झाला आहे. अहिल्यानगरमध्ये 46 टक्के, धाराशिव आणि लातूरसह काही भागांतही पावसाचे प्रमाण फार कमी आहे. छत्रपती संभाजीनगरमध्ये सरासरीपेक्षा 18 टक्के कमी पाऊस झाला आहे. मात्र जिल्ह्यात सर्व ठिकाणी सारखा पाऊस झाला नसल्याने काही भागांत तीव्र दुष्काळाची परिस्थिती असल्याचं सांगण्यात आलं आहे. विदर्भात यवतमाळमध्ये 23 टक्के, चंद्रपूर आणि नागपूरमध्ये 28 टक्के, तर अमरावतीमध्ये सुमारे 40 टक्के पावसाची तूट आहे.

पावसाचा अंदाज काय? कुठे कोसळणार? 

दरम्यान, पुढील काही दिवसांत काही भागांना हलक्या ते मध्यम पावसाचा दिलासा मिळण्याची शक्यता आहे. बुधवारी सातारा आणि कोल्हापूरच्या घाट परिसरासह सिंधुदुर्गला यलो अलर्ट देण्यात आला आहे. या भागांत ढगाळ वातावरणासह हलक्या ते मध्यम सरींची शक्यता आहे. पुणे, अहिल्यानगर, नाशिक, पालघर, ठाणे, मुंबई, रायगड, रत्नागिरी आणि सोलापूरमध्ये मेघगर्जनेसह वादळी वारे वाहण्याची शक्यता आहे. मात्र या भागांत पाऊस होईलच अशी शक्यता नाही. गुरुवारीही पश्चिम महाराष्ट्र, नाशिक आणि कोकणातील काही भागांत मेघगर्जनेसह हलक्या सरींचा अंदाज आहे.

शुक्रवारीही पश्चिम महाराष्ट्रातील काही भागांत ढगाळ वातावरण राहण्याची शक्यता आहे. मराठवाड्यात सध्या काही प्रमाणात पोषक वातावरण तयार झाल्याचं दिसत असून, या भागात हलक्या सरी पडण्याची शक्यता आहे. पश्चिम महाराष्ट्रातील घाट परिसरातही काही प्रमाणात पाऊस होऊ शकतो. मात्र मराठवाडा आणि विदर्भातील उर्वरित भागांसह इतर ठिकाणी सध्या फारशा पावसाची शक्यता वर्तवण्यात आलेली नाही. त्यामुळे पुढील दोन ते तीन दिवसांत काही भागांत पाऊस होण्याची शक्यता असली, तरी तीव्र दुष्काळाचा सामना करणाऱ्या भागांना मोठ्या पावसाचा दिलासा मिळण्याची शक्यता सध्या दिसत नाही.