वेदर रिपोर्ट : प्रतिचक्रवात आणि घामाच्या धारा, उष्णतेचा अलर्ट कुठे?

हेही वाचा : वर्गमैत्रिणीच्या घरी गेला अन् गळफास घेतलेल्या अवस्थेत आढळला मृतदेह, दहावीच्या विद्यार्थ्यासोबत काय घडलं?

या भागात सरासरीपेक्षा दोन ते सात अंश सेल्सिअसने तापमान वाढले 

मुंबईसह संपूर्ण कोकण विभागात कमाल तापमान 33 ते 38 अंश सेल्सिअसपर्यंत पोहोचले आहे. या भागात सरासरीपेक्षा दोन ते सात अंश सेल्सिअसने तापमान वाढले आहे. मध्य महाराष्ट्रातील खानदेश, नाशिक ते सोलापूरपर्यंतच्या दहा जिल्ह्यांमध्ये कमाल तापमान 34 ते 38 अंश सेल्सिअस नोंदवले गेले असून तापमानात दोन ते साडेचार अंश सेल्सिअसची वाढ झाली आहे. मराठवाड्यातील आठ जिल्ह्यांमध्ये तापमान 34 ते 36.6 अंश सेल्सिअसपर्यंत गेले आहे. तर विदर्भातील अकरा जिल्ह्यांमध्ये कमाल तापमान 35 ते 39 अंश सेल्सिअसपर्यंत पोहोचले आहे. विदर्भात तापमानात दोन ते 6.2 अंश सेल्सिअसची वाढ झाली आहे. त्यामुळे राज्यातील बहुतांश भागांत नागरिकांना उन्हाचे चटके सहन करावे लागत आहेत.

तापमानात झालेल्या या वाढीमागे प्रतिचक्रवात हे प्रमुख कारण

तापमानात झालेल्या या वाढीमागे प्रतिचक्रवात हे प्रमुख कारण असल्याचे हवामान तज्ज्ञांकडून सांगण्यात येत आहे. प्रतिचक्रवातामुळे हवेचा दाब वाढतो आणि हवा वर जाण्याऐवजी खाली येते. या प्रक्रियेमुळे हवेतील आर्द्रता कमी होते आणि ढगांची निर्मिती होत नाही. परिणामी, सूर्यप्रकाश थेट जमिनीवर पडल्याने जमीन वेगाने तापते आणि तापमानात वाढ होते. ऑक्टोबर हा पावसाळा आणि हिवाळा या दोन ऋतूंमधील संक्रमणाचा काळ असल्याने या महिन्यात ऑक्टोबर हिटचा अनुभव येतो. सध्या महाराष्ट्रावर ढगांचे आवरण दिसत नाही. बंगालचा उपसागर आणि अरबी समुद्रातही पावसासाठी पोषक वातावरण नसल्याचे सांगण्यात येत आहे. बंगालच्या उपसागरातून आर्द्रतायुक्त वारे महाराष्ट्राच्या दिशेने आल्यास तापमानात घट होऊ शकते. मात्र, सध्या तशी परिस्थिती दिसत नाही.

बुधवारसाठी सध्या कोणत्याही भागात उष्णतेचा इशारा देण्यात आलेला नसला, तरी हवामानाचा अंदाज दर सहा तासांनी अद्ययावत केला जातो. त्यामुळे पुढील दोन ते तीन दिवस ऑक्टोबर हिटचा प्रभाव कायम राहण्याची शक्यता आहे. विशेषतः मुंबई आणि कोकण किनारपट्टीवर उष्णतेचा अधिक त्रास जाणवू शकतो. तापमान 30 अंश सेल्सिअस असले तरी प्रत्यक्षात 35 ते 38 अंश सेल्सिअस असल्यासारखे जाणवू शकते. या काळात शरीरातील पाण्याचे प्रमाण कमी होऊ नये म्हणून पुरेसे पाणी पिणे गरजेचे आहे. घराबाहेर पडताना सनस्क्रीन लावणे, टोपी घालणे किंवा छत्रीचा वापर करणे आवश्यक आहे. शक्य असल्यास भर उन्हाच्या वेळेत बाहेर पडणे टाळावे. मराठवाडा आणि विदर्भातही तापमान वाढण्याचा अंदाज असल्याने नागरिकांनी काळजी घ्यावी, असे आवाहन करण्यात आले आहे.