गाड्या फोडू, टोलनाका फोडू!, कल्याण-शिळफाटा ट्रॅफिकवरून मनसेचा संताप

कल्याण-शिळफाटा मार्गावर मेट्रोची कामे, विविध ठिकाणी सुरू असलेली रस्त्यांची कामे, अपुरी रस्तेक्षमता आणि अवजड वाहनांची वाढती वर्दळ यामुळे दररोज वाहतूक कोंडी होत आहे. या कोंडीचा फटका नोकरदार, विद्यार्थी, महिला, ज्येष्ठ नागरिक आणि अत्यावश्यक सेवांना बसत आहे. नागरिकांना दररोज प्रवासासाठी मोठा वेळ खर्च करावा लागत असतानाही प्रशासनाकडून ठोस उपाययोजना होत नसल्याचा आरोप मनसेने केला.

शिळफाट्याची अवस्था स्ट्रेट ऑफ हॉर्मुझसारखी!

आंदोलनादरम्यान बोलताना राजू पाटील यांनी शिळफाटा मार्गावरील वाहतूक व्यवस्थेवर जोरदार टीका केली. या रस्त्याची अवस्था ‘स्ट्रेट ऑफ हॉर्मुझ’सारखी झाली असून, वाहनांना पुढे जाणेही कठीण झाले आहे, अशा शब्दांत त्यांनी परिस्थितीवर नाराजी व्यक्त केली. वाहतूक कोंडीला वाहतूक विभागाची कार्यपद्धती जबाबदार असल्याचा आरोपही त्यांनी केला. विविध ठिकाणी सुरू असलेल्या रस्त्यांच्या कामांना अनेक वर्षे लागण्याची शक्यता असताना आणि रस्त्यांसाठी आवश्यक जागाही अद्याप पूर्णपणे ताब्यात आलेली नसताना अशा कामांना परवानगी दिलीच कशी जाते, असा सवाल पाटील यांनी उपस्थित केला. विकासकामांचे नियोजन आणि वाहतूक व्यवस्थापन यांच्यात समन्वय नसल्यामुळे नागरिकांना त्याचा त्रास सहन करावा लागत असल्याचेही त्यांनी सांगितले.

हे ही वाचा>> भिवंडी: गुलाबजामच्या भांड्यात आढळला उंदीर, Video व्हायरल अन् FDA ची कारवाई

शिळफाटा मार्गावरील वाहतूक कोंडी कमी करण्यासाठी अवजड वाहनांच्या वाहतुकीचे योग्य नियोजन करणे आवश्यक असल्याचे राजू पाटील यांनी म्हटले. अवजड वाहने ठराविक वेळेत आणि टप्प्याटप्प्याने सोडल्यास वाहतुकीचा ताण कमी होऊ शकतो. मात्र, प्रशासनाने याकडे दुर्लक्ष केल्यास मनसे स्वतःहून रस्त्यावर उतरून कारवाई करेल, असा इशारा त्यांनी दिला. यापुढे अवजड वाहने अवेळी सोडल्यास संबंधित गाड्या फोडू, असा संतप्त इशारा पाटील यांनी दिल्याने 

आंदोलनादरम्यान मनसेचा आक्रमक पवित्रा पाहायला मिळाला. टोल वसुली होते, मग रस्त्यांची दुरुस्ती का नाही? रस्त्यांच्या दुरवस्थेवरून राजू पाटील यांनी टोल प्रशासनालाही लक्ष्य केले. वाहनचालकांकडून नियमितपणे टोल वसूल केला जात असताना रस्त्यांची वेळेत डागडुजी का केली जात नाही, असा सवाल त्यांनी उपस्थित केला. रस्त्यांची डागडुजी तीन दिवसांत पूर्ण न केल्यास टोलनाकाही फोडू, असा इशाराही त्यांनी दिला.

हे ही वाचा>> थरार! भरधाव कंटेनरची तीन दुचाकींना धडक, चौघांचा जागीच मृत्यू

शिळफाटा मार्गावरील वाहतूक कोंडीचा प्रश्न केवळ तात्पुरत्या उपाययोजनांनी सुटणार नाही. त्यासाठी अवजड वाहनांच्या वाहतुकीचे नियोजन, रस्त्यांची वेळेत दुरुस्ती, सुरू असलेल्या विकासकामांचे योग्य व्यवस्थापन आणि विविध शासकीय यंत्रणांमध्ये समन्वय आवश्यक आहे, अशी भूमिका मनसेने मांडली. नागरिकांच्या दैनंदिन प्रवासाशी संबंधित या गंभीर प्रश्नावर प्रशासनाने तातडीने ठोस पावले उचलावीत, अशी मागणी आंदोलनातून करण्यात आली. अन्यथा, आंदोलन अधिक तीव्र करण्याचा इशाराही मनसेच्या वतीने देण्यात आला.