नागपूर : पत्नी गुपचूप शिक्षकाला भेटायची, अनैतिक संबंधाची खबर पोलीस पतीला मिळाली

 अंबाझरी तलावात आढळला मृतदेह; दोन महिन्यांपासून सुरू होता शोध

पत्नीच्या सततच्या जाचाला कंटाळून शीलरत्न फेब्रुवारी महिन्यात आपल्या भावाच्या घरी राहायला गेले होते. 22 फेब्रुवारी रोजी ते तिथून बाहेर पडले, त्यानंतर त्यांचा कोणाशीही संपर्क होऊ शकला नाही. त्यांच्या कुटुंबियांनी प्रतापनगर पोलीस ठाण्यात ते बेपत्ता असल्याची तक्रार दाखल केली होती. दीर्घकाळाच्या शोधानंतर, 24 एप्रिल रोजी अंबाझरी तलावात त्यांचा मृतदेह तरंगताना आढळून आला. सुरुवातीला पोलिसांनी या घटनेची नोंद आकस्मिक मृत्यू म्हणून केली होती, मात्र सखोल तपास सुरू असताना अनेक धक्कादायक बाबी समोर आल्या. शीलरत्न यांनी पत्नी आणि तिच्या प्रियकराच्या सततच्या छळाला आणि मानसिक त्रासाला कंटाळूनच आत्महत्या केल्याचे निष्पन्न झाले.

हेही वाचा : कधीकाळी 32 मतांनी निवडणूक जिंकून आमदार झाले, भाजपने विधानपरिषदेची संधी दिलेले प्रमोद जठार कोण आहेत?

पत्नी आणि प्रियकराविरुद्ध गुन्हा दाखल; आरोपी पत्नीला अटक

पोलीस उपनिरीक्षक अविनाश निकालजे यांनी केलेल्या तपासात मिळालेल्या पुराव्यांच्या आधारे ही केवळ आत्महत्या नसून आत्महत्येसाठी प्रवृत्त केल्याचा प्रकार असल्याचे स्पष्ट झाले. पत्नी रुचिका बेलेकर आणि तिचा प्रियकर महेश मेश्राम या दोघांनी संगनमत करून शीलरत्न यांना मरणास प्रवृत्त केल्यामुळे त्यांच्याविरुद्ध गुन्हा दाखल करण्यात आला आहे. या कारवाईअंतर्गत पोलिसांनी आरोपी पत्नी रुचिकाला अटक केली असून तिची अधिक चौकशी केली जात आहे. या घटनेमुळे पोलीस दलासह परिसरात हळहळ व्यक्त केली जात आहे. रक्षक असलेल्या पोलीस कर्मचाऱ्याला आपल्याच घरातून मिळालेल्या त्रासामुळे जीव गमवावा लागल्याने नात्यांच्या विदारकतेवर प्रश्नचिन्ह उपस्थित केले जात आहे.

तपासात समोर आले क्रूर वास्तव; कायदेशीर कारवाई सुरू

या संपूर्ण प्रकरणाचा तपास करत असताना पोलिसांना समजले की, आरोपी पत्नी आपल्या पतीला वारंवार अपमानित करत होती. पती कर्तव्यावर असताना पत्नी प्रियकरासोबत वेळ घालवत असे आणि विरोध केल्यास त्यांना मालमत्तेवरून धमकावत असे. शीलरत्न यांनी आपल्या मनातील व्यथा आपल्या जवळच्या व्यक्तींकडेही व्यक्त केली होती, असे समजते. सध्या पोलीस प्रियकर महेश मेश्राम याचा शोध घेत असून, या प्रकरणात अधिक ठोस पुरावे गोळा करण्याचे काम सुरू आहे. आरोपी पत्नीला न्यायालयात हजर केले जाणार असून तिला कडक शिक्षा व्हावी अशी मागणी मृत शीलरत्न यांच्या नातेवाईकांनी केली आहे. या घटनेने नागपूर पोलीस वर्तुळात मोठी चर्चा सुरू असून सर्वत्र दुःख व्यक्त करण्यात येत आहे.

इतर महत्त्वाच्या बातम्या 

नागपूर : 'प्रदेश त्यांचा, शहर त्यांचं..कुणाला खाज असेल त्यांनी यावं..' धीरेंद्र शास्त्रींचे श्याम मानव यांना खुले आव्हान