पर्यटनासाठी आलेल्या जपानच्या महिलेला डोंगरावर घेरलं, 5 तरुणांकडून अश्लील चाळे...घटना CCTV मध्ये कैद

भरदिवसा विनयभंग आणि महिलेचा धाडसी प्रतिकार

मिळालेल्या माहितीनुसार, जपानहून राजस्थानच्या भ्रमंतीवर आलेली ही महिला पर्यटक रविवारी सकाळी जयगड किल्ला पाहण्यासाठी गणेश पोल आणि किल्ल्याच्या दरम्यानच्या पायवाटेवरून जात होती. यावेळी रस्ता निर्जन असल्याचे पाहून 5 अज्ञात तरुणांनी तिला अडवले आणि तिच्याशी गैरवर्तन करण्यास सुरुवात केली. संतापजनक बाब म्हणजे या तरुणांनी तिच्यासोबत अश्लील कृत्ये केली, ज्यामुळे ती महिला प्रचंड घाबरली होती. मात्र, अशा कठीण परिस्थितीतही तिने हिंमत न हारता आरडाओरडा करण्यास सुरुवात केली. महिलेचा आवाज ऐकून जवळच तैनात असलेला सुरक्षा रक्षक तिच्या दिशेने धावत येत असल्याचे पाहून पाचही आरोपींनी तातडीने डोंगराच्या खालच्या दिशेला पळ काढला. या धक्क्यातून सावरल्यानंतर पीडित महिलेने जयगडमधील कर्मचाऱ्यांच्या मदतीने आमेर पोलीस ठाणे गाठून याप्रकरणी अधिकृत तक्रार नोंदवली आहे.

सीसीटीव्ही फुटेज आणि पोलिसांची शोधमोहीम

घटनेची माहिती मिळताच पोलिसांनी परिसरातील सीसीटीव्ही फुटेजची तपासणी सुरू केली आहे. एका फुटेजमध्ये 5 संशयित तरुण डोंगरावरून वेगाने खाली उतरताना स्पष्टपणे दिसत आहेत. आमेर पोलीस ठाण्याचे प्रभारी (SHO) गौतम डोटासरा यांनी सांगितले की, संशयितांच्या वर्णनावरून स्थानिक गुन्हेगार आणि संशयास्पद गाईड्सचे रेकॉर्ड तपासले जात आहेत. पोलिसांनी आरोपींची ओळख पटवण्याचे काम जवळपास पूर्ण केले असून त्यांना लवकरच बेड्या ठोकल्या जातील, असा दावा प्रशासनाकडून करण्यात आला आहे. या घटनेचा तपास करण्यासाठी विशेष पथके तयार करण्यात आली असून संशयितांच्या हालचालींवर तांत्रिक पाळत ठेवली जात आहे. परदेशी पर्यटकांच्या सुरक्षेसाठी आमेर आणि जयगड परिसरात पोलीस गस्त वाढवण्याचे निर्देशही वरिष्ठ अधिकाऱ्यांनी दिले असून स्थानिक पातळीवर आरोपींचा शोध युद्धपातळीवर सुरू आहे.

धक्कादायक बाब म्हणजे गेल्या 9 दिवसांतील जयपूरमधील ही दुसरी मोठी घटना आहे. याआधी जलमहालच्या पाळवर देखील एका परदेशी महिलेला सेल्फीच्या बहाण्याने जमावाने घेरले होते आणि तरुणांनी तिच्या गळ्यात हात घालून ओढण्याचा प्रयत्न केला होता. वारंवार घडणाऱ्या अशा घटनांमुळे राजस्थानच्या आदरातिथ्यावर आणि पर्यटकांच्या सुरक्षेवर प्रश्नचिन्ह उपस्थित केले जात आहे. विदेशी पर्यटकांच्या मनात असुरक्षिततेची भावना निर्माण झाल्यास त्याचा मोठा फटका राज्याच्या पर्यटन व्यवसायाला आणि अर्थव्यवस्थेला बसू शकतो. त्यामुळे अशा विकृत प्रवृत्तींना आळा घालण्यासाठी कडक कायदेशीर कारवाई होणे अत्यंत गरजेचे आहे. जयपूर पोलिसांनी दिलेल्या आश्वासनानुसार, या प्रकरणातील आरोपींना कठोरात कठोर शिक्षा होऊन जागतिक स्तरावर गेलेला नकारात्मक संदेश पुसण्याचा प्रयत्न केला जाणार आहे. नागरिकांनीही पर्यटकांच्या बाबतीत संवेदनशील राहून अशा घटना रोखण्यासाठी सहकार्य करण्याचे आवाहन करण्यात आले आहे.

इतर महत्त्वाच्या बातम्या 

बीड: 17 वर्षीय विवाहित मुलगी बेपत्ता, वडिलांनी पोलीस ठाणे गाठत दिली माहिती, पोलीस तपासात मृतदेह विहिरीत आढळला