विरह सहन होईना, प्रेयसीला भेटण्यासाठी तिचं गाव गाठलं, पण चोरीचा आरोप करुन लोकांनी इतकं मारलं की जीव गेला

जिल्हा पोलिस अधीक्षक रीशमा रामेसन यांनी दिलेल्या माहितीनुसार, ही घटना शनिवारी उशिरा रात्री पडवा पोलीस ठाण्याच्या हद्दीतील तेलियाही गावात घडली. मृत तरुणाची ओळख मुरमा गावातील पवन राम अशी झाली असून तो त्याच पोलीस ठाण्याच्या कार्यक्षेत्रातील रहिवासी होता. रात्री सुमारे 12.30 वाजता एका तरुणाला चोरीच्या आरोपावरून गावकऱ्यांनी पकडून ठेवले असल्याची माहिती पोलिसांना मिळाली.

माहिती मिळताच गस्त पथक घटनास्थळी दाखल झाले. त्यावेळी संबंधित तरुणाला बांधून अमानुष मारहाण करण्यात आल्याचे आढळले. पोलिसांनी जमावातून त्याची सुटका करून तातडीने जवळच्या रुग्णालयात दाखल केले; मात्र डॉक्टरांनी त्याला मृत घोषित केले. घटनेनंतर परिसरात तणावाचे वातावरण निर्माण झाले आहे.

पोलिसांच्या प्राथमिक तपासानुसार, संबंधित तरुण प्रेयसीला भेटण्यासाठी गावात गेला होता, अशी शक्यता व्यक्त करण्यात येत आहे. त्याच वेळी ग्रामस्थांनी त्याला पकडून ट्रॅक्टरची बॅटरी चोरण्याचा प्रयत्न केल्याचा आरोप केला. तथापि, त्याच्याकडून कोणतीही चोरीची बॅटरी जप्त झालेली नाही. त्यामुळे चोरीच्या आरोपाबाबत संशय निर्माण झाला आहे.

उपविभागीय पोलिस अधिकारी राजेश कुमार यांनी सांगितले की, ताब्यात घेण्यात आलेल्या संशयिताची ओळख 35 वर्षीय पारस नाथ मेहता अशी झाली आहे. इतर संशयितांचा शोध घेण्यासाठी छापेमारी सुरू आहे. हे प्रकरण जमावाकडून करण्यात आलेल्या हत्येचे असल्याचे स्पष्ट होत असून भारतीय न्याय संहिता कलम 103(2) सह इतर संबंधित कलमांनुसार गुन्हा नोंदविण्यात आला आहे.

दंडाधिकाऱ्यांच्या उपस्थितीत वैद्यकीय टीमकडून मृतदेहाचे शवविच्छेदन करण्यात येत असून संपूर्ण प्रक्रियेचे चित्रिकरण व छायाचित्रण केले जात आहे, जेणेकरून तपासात कोणतीही त्रुटी राहू नये. पोलिसांकडून घटनेचा सखोल तपास सुरू असून उर्वरित संशयितांना अटक करण्यासाठी प्रयत्न सुरू आहेत.

इतर महत्त्वाच्या बातम्या

धाराशिव : चार दिवसांपूर्वी साखरपुडा, मेहंदीचा रंग उतरण्याआधीच नवरदेव अन् नवरी मुलीवर काळाचा घाला