अल्पवयीन मुलांच्या गुप्तांगावर पेट्रोल ओतलं, गरम चमच्याने चटके दिले; धक्कादायक प्रकार

पोलिसांनी दिलेल्या माहितीनुसार, पीजीजवळ सुरू असलेल्या एका बांधकामस्थळावर चोरी करण्याच्या संशयावरून या मुलांना पकडण्यात आले. आरोपींना संशय होता की ही मुले चोरी करण्याच्या उद्देशाने परिसरात फिरत आहेत. याच संशयातून काही पुरुषांनी या चार मुलांना जबरदस्तीने पीजीतील एका खोलीत डांबून ठेवले आणि त्यांना बेदम मारहाण केली.

या घटनेत आरोपींनी मुलांशी अत्यंत क्रूर वर्तन केल्याचे समोर आले आहे. तक्रारीनुसार, मुलांचे कपडे काढून त्यांना मारहाण करण्यात आली. तसेच गरम चमच्यांनी भाजणे, मुलांच्या खासगी अवयवांवर पेट्रोल ओतल्याचेही आरोप करण्यात आले आहेत. या अमानुष छळामुळे मुले गंभीररीत्या जखमी झाली असून मानसिक धक्काही बसल्याचे सांगितले जात आहे.

ही घटना उघडकीस येण्यामागे मुलांच्या मातांची धडपड कारणीभूत ठरली. एका अल्पवयीन मुलाच्या आईने कामावरून घरी परतल्यानंतर तिचा 12 वर्षांचा मुलगा बेपत्ता असल्याचे लक्षात आले. मुलाचा शोध घेत असताना तिला आणखी एका महिलेची भेट झाली. त्या महिलेची दोन मुलेही बेपत्ता असल्याचे समजले. त्यानंतर दोघींनी एकत्रितपणे मुलांचा शोध सुरू केला.

शोधादरम्यान त्यांना माहिती मिळाली की एका पीजीमध्ये काही लोकांनी तीन ते चार मुलांना खोलीत डांबून ठेवून मारहाण केली आहे. ही माहिती मिळताच दोन्ही महिला तात्काळ संबंधित पीजीमध्ये पोहोचल्या. तेथे त्यांनी पाहिले की त्यांच्या मुलांसह आणखी एक मुलगा खोलीत बंदिस्त असून पाच ते सहा जण त्यांना पहारा देत होते.

महिलांनी मुलांची सुटका करण्याची विनंती केली असता आरोपींनी त्यांना शिवीगाळ केली आणि धमकावले. मात्र, सातत्याने विनवण्या केल्यानंतर अखेर आरोपींनी मुलांना सोडून दिले. सुटकेनंतर जखमी मुलांना तातडीने वैद्यकीय उपचारांसाठी रुग्णालयात दाखल करण्यात आले.

या घटनेनंतर मंगळवारी पोलिसांत तक्रार दाखल करण्यात आली. त्यानुसार एफआयआर नोंदवण्यात आली असून पोलिसांनी दोन आरोपींना अटक केली आहे. उर्वरित आरोपी फरार असून त्यांचा शोध घेण्यासाठी विशेष पथके तैनात करण्यात आली आहेत. पोलिसांकडून या प्रकरणाचा सखोल तपास सुरू असून दोषींवर कठोर कारवाई केली जाईल, असे आश्वासन देण्यात आले आहे. या घटनेमुळे संपूर्ण परिसरात संतापाची लाट उसळली असून अल्पवयीन मुलांच्या सुरक्षेचा प्रश्न पुन्हा एकदा ऐरणीवर आला आहे.

इतर महत्त्वाच्या बातम्या 

नांदेड : फुल्ल दारु पिला, नादात अंगावर पेट्रोल ओतून घेतलं, अन् सलमानने स्वत:ला पेटवलं; उपचारादरम्यान मृत्यू