kandivali murder : आला अन् तरुणाला घातली गोळी, कांदिवलीत भरदिवसा थरार

मुंबईला लागून असलेल्या कांदिवली पश्चिम भागात एका घटनेनं खळबळ उडाली आहे. वर्दळ असलेल्या रस्त्यावर एका 30 वर्षीय तरुणाची गोळी घालून हत्या करण्यात आली. सकाळी 7.51 वाजता गणेश नगरमध्ये ही घटना घडली. या प्रकरणाचा तपास कांदिवली पोलिसांनी सुरू केला आहे. या घटनेचा व्हिडीओही समोर आला आहे.

ज्याची गोळी झाडून हत्या करण्यात आली, त्याचं नाव मनोज लालचंद चौहान असं आहे. त्याच वय 30 वर्ष असून, तो कास्टिंग इमिटेशनचं काम करायचा.

गोळी झाडतानाचा प्रसंग सीसीटीव्हीत कैद, पोलिसांचा नकार

कांदिवली पश्चिममधील गणेश नगर भागात रविवारी (28 मे) सकाळी 7.51 वाजता मनोज चौहान यांची गोळ्या झाडून हत्या केली. गोळ्या झाल्यानंतर तरुण रस्त्यावर खाली पडला. त्यानंतर आरोपी घटनास्थळावरून फरार झाला.

हेही वाचा >> बच्चू कडू-राणा दाम्पत्यात संघर्ष पेटला, लोकसभेच्या जागेवरून दावे प्रतिदावे

घटनेनंतर परिसरात खळबळ उडाली. माहिती कळताच पोलिसांनी घटनास्थळी धाव घेतली. मात्र, गोळीबार झाला नसल्याचं पोलिसांनी म्हटलं आहे. या घटनेचा व्हिडीओ समोर आला असून, त्यात गोळी झाडताना आरोपी दिसत आहे. तसेच गोळी लागल्यानंतर तरुण खाली पडताना दिसत आहे.

हेही वाचा >> New Parliament: नव्या संसद भवनाबाबत शरद पवारांचं मोठं विधान, म्हणाले मी…

पोलिसांनी मृत मनोज लालचंद चौहान याचा मृतदेह घटनास्थळावरून ताब्यात घेतला. त्यानंतर मृतदेह कांदिवली पोलिसांनी शताब्दी हॉस्पिटमध्ये पोस्टमार्टमसाठी पाठवला.

तरुणाच्या हत्येनंतर वरिष्ठ पोलीस अधिकारीही घटनास्थळी दाखल झाले होते. सध्या पोलिसांनी प्रकरणाचा तपास सुरू केला असून, फरार झालेल्या आरोपींचा शोध घेणं पोलिसांनी सुरू केलं आहे. या घटनेबद्दल झोन 11 चे पोलीस उपायुक्त अजय कुमार बन्सल म्हणाले, हत्येचा गुन्हा दाखल करण्यात आला आहे. आरोपीचा शोध घेतला जात आहे. आरोपीला लवकरच अटक केली जाईल. हत्या का करण्यात आली, याबद्दल अद्याप काहीही समजू शकलेलं नाही.

गोळीबार झालाय, माजी नगरसेवकाचा दावा

या घटनेबद्दल बोलताना स्थानिक माजी नगरसेवक कमलेश यादव म्हणाले, “गोळीबाराची घटना घडली आहे. या घटनेनंतर स्थानिकांमध्ये संतापाची भावना आहे. हे पोलिसांचं अपयश आहे. यापूर्वीही या परिसरात गोळीबाराची घटना घडलेली आहे.”