अमरावतीतील कथित लव्ह जिहाद प्रकरणात AIMIMची उडी, नवनीत राणांना अटक करण्याची मागणी

रोहिदास हातांगळे

बीड: नेहमी कोणत्या ना कोणत्या मुद्यावरुन सतत चर्चेत असणाऱ्या, खासदार नवनीत राणांविरोधात आता एमआयएम आक्रमक झाली आहे. अमरावती येथे लव्ह जिहादच्या नावाखाली बेताल वक्तव्य करत, सामाजिक सलोखा बिघडवण्याचा प्रयत्न राणा यांनी केला आहे त्यामुळं त्यांच्यावर गुन्हा दाखल करावा अशी मागणी करत बीडमध्ये एमआयएम आक्रमक झाली आहे. जर तात्काळ कारवाई नाही केली, तर एमआयएम रस्त्यावर उतरून आंदोलन करेल असा इशाराही एमआयएमचे जिल्हाध्यक्ष शेख शफिक यांनी दिला आहे.

एमआयएमचे नेते शेख शफीक काय म्हणाले?

एमआयएमचे नेते शेख शफीक म्हणाले ” अमरावतीमध्ये गत काही दिवसांपूर्वीच, हिंदू-मुस्लिम दंगल झाली होती. त्यात भर टाकण्याचे काम खासदार नवनीत राणा यांच्याकडून होत आहे. महाविद्यालयीन तरुणी तिच्या वैयक्तिक कामांसाठी रेल्वेच्या माध्यमातून पुणे आणि इतर ठिकाणी गेली होती. मात्र मुस्लिम तरुणाने तिला घेऊन गेला, असं म्हणत ‘लव्ह जिहाद’चा आरोप राणा यांनी केला. मात्र हा प्रकार लव्ह जिहादचा नाही, राणा यांना केवळ जातीय दंगल घडून आणायची होती. यामुळेच त्यांनी हा खटाटोप चालवला आहे. यामुळे समाजातील सामाजिक सलोखा बिघडवण्याचा प्रयत्न करणाऱ्या खासदार नवनीत राणा, यांच्यावर गुन्हा दाखल करून कठोर कारवाई करावी. अन्यथा एमआयएम रस्त्यावर उतरून उग्र आंदोलन करेल असा इशारा एमआयएमचे नेते बीड जिल्हाध्यक्ष शेख शफिक यांनी दिला आहे.

तरुणीचा नवनीत राणांवर गंभीर आरोप

६ सप्टेंबर रोजी मुलगी बेपत्ता झाल्याची तक्रार पोलिसांना प्राप्त झाली होती. त्यानंतर पोलिसांनी बेपत्ता तरुणीचा शोध सुरू केला होता. दरम्यान, ९ सप्टेंबर रोजी पहाटे ही तरुणी सातारा येथे आढळून आली . त्यानंतर तिला अमरावतीतील राजापेठ पोलीस ठाण्यात आणण्यात आलं.

तरुणीने पोलीस ठाण्यात हजर झाल्यानंतर घडलेला प्रकार सांगितला. ‘आईवडिलांशी वाद झाला होता. शिक्षण घेण्यासाठी मी घरातून रागाच्या भरात निघून गेले होते. मला कुणीही पळवून नेलं नाही आणि लग्नही केलं नाही. माझी बदनामी थांबवा. नवनीत राणांनी खोटी माहिती दिली आहे. लव्ह जिहादच्या मुद्द्यावरून माझी बदनामी केली जात आहे”, असा आरोप या तरुणीने केला आहे.

नवनीत राणांनी पोलिसांशी घातली होती हुज्जत

दरम्यान संबंधित प्रकरण लव्ह जिहादचे असल्यामुळे या प्रकरणात स्थानिक खासदार नवनीत राणा तसेच राज्यसभेचे खासदार अनिल बोंडे यांनी लक्ष घातले होते. खासदार राणा यांनी पोलीस ठाण्यात जावून पोलिसांशी हुज्जत घातली होती. बनावट कागदपत्रांच्या आधारे लग्न लावून दिल्याचा आरोपही राणा यांनी केला होता. दरम्यान, हे प्रकरण ताजे असतानाच बुधवारी रात्री 11 वाजण्याच्या सुमारास रात्री उशिरा सातारा येथील रेल्वे स्थानकावर रेल्वे पोलिसांनी पीडित युवतीस ताब्यात घेतले आहे. परंतु पोलिसांसमोर दिलेल्या जबाबात तरुणीने नवनीत राणांवरतीच गंभीर आरोप केले आहेच.