अनैतिक संबंध लपवण्यासाठी आईने मुलाची प्रियकराच्या मदतीने केली हत्या, जळगावमधली धक्कादायक घटना

मनिष जोग, प्रतिनिधी, जळगाव

जळगाव जिल्ह्यात आईनेच आपल्या पोटच्या मुलाची प्रियकराच्या मदतीने हत्या केल्याची घटना समोर आली आहे. मुलाला आईच्या अनैतिक संबंधांबाबत समजलं होतं. तसंच तो अडसर ठरू शकतो हे लक्षात आल्यानंतर आईने तिच्या प्रियकराच्या साथीने मुलाला संपवलं आहे. मुलाला ब्राह्मणपूर येथील जंगलात नेऊन गळफास देऊन त्याची हत्या केली. या प्रकरणी पोलिसांनी मुलाची आई आणि तिचा प्रियकर अशा दोघांना अटक केली आहे.

पुरूषोत्तम उर्फ प्रशांत विलास पाटील असं हत्या करण्यात आलेल्या मुलाचं नाव आहे. तो 14 वर्षांचा होता. सावरखेडा शिवार, जलराम नगर जळगाव या ठिकाणी तो वास्तव्यास होता. प्रशांतचे वडील खासगी वाहन चालक आहेत अशीही माहिती मुंबई तकला मिळाली आहे.

Crime: इंजिनिअर मुलाने आई-वडिलांसमोर केली पत्नीची हत्या, मुंडकं कापून फेकलं नाल्यात तर धड टाकून दिलं जंगलात

प्रशांतची आई मंगला पाटील आणि प्रमोद जयदेव शिंपीसोबत अनैतिक संबंध होते. प्रशांतला या संबंधाबाबत कळलं होतं. त्याला ही बाब समजली आहे हे मंगला पाटील आणि प्रमोद या दोघांनाही समजलं. कारण प्रशांत त्याच्या आईला म्हणाला होता की तू प्रमोदसोबत असलेले संबंध संपव. पण प्रशांत अडसर ठरू शकतो हे लक्षात आल्यानंतर मंगला पाटील आणि प्रमोद शिंपी यांनी त्याला संपवलं.

चार महिन्यापूर्वी बेपत्ता झाला तरूण, चुलत भावानेच खून करून मृतदेह शेतात पुरल्याची धक्कादायक बाब उघड

नेमकं काय घडलं?

16 जानेवारीला प्रशांतच्या आईने त्याला आपल्या घरी कबुतरांचा पिंजरा आणायचा आहे असं सांगून प्रमोद सोबत पाठवलं. प्रमोद त्याच्या आणखी एका मित्राला घेऊन ब्राह्मणपूर येथील जंगलात गेला. त्याआधी त्याने रावेरमधून एक दोरही विकत घेतला. ब्राह्मणपूर येथील जंगलात नेऊन प्रमोदने प्रशांतला गळफास दिला आणि ठार केलं.

प्रशांतच्या वडिलांनी पोलिसांत तक्रार दिली होती. मुलगा हरवल्याची तक्रार दिल्यानं पोलिसांनी तपास सुरु होता. त्यातूनच हा सगळा धक्कादायक प्रकार उघडकीस आला आहे. दरम्यान, पोलिसांचं लक्ष विचलीत करण्यासाठी आईनं चक्क पालकमंत्र्यांची भेट घेऊन मुलगा सापडत नाही, म्हणून राजकीय दबाव आणण्यासाठीही प्रयत्न केला होता. पोलिसांनी केलेल्या तपासात तांत्रिक माहितीतून प्रमोद आणि पुरुषोत्तम एकमेकांच्या संपर्कात असल्याचं समोर आलं. त्यानंतर पोलिसांनी प्रमोदला ताब्यात घेतलं. सुरुवातील उडवाउडवीची उत्तर देणारा प्रमोद पोलिसांच्या खाकीचा हिसका पाहून पोपटासारखा बोलू लागला.

मुलगा आपल्या अनैतिक संबंधांबाबत नवऱ्याला सांगेल अशी भीती मंगलाबाईला वाटत होते. त्यामुळे मंगला त्याच्यापासून सावधही झालेली. आई घरी आली नाही, किंवा तिला उशीर झाला की मुलगा तिला कॉल करायचा. कुठे आहेस विचारायला व्हिडीओ कॉल करण्यासाठीही तगादा लावायचा. यातूनच मुलगा अडथळा ठरु लागल्यानं मंगलाबाईनं आपल्या प्रियकराकडूनच त्याची हत्या घडवून आणली.