गुजरात : मुख्यमंत्री विजय रुपाणी यांचा राजीनामा; केंद्रीय आरोग्यमंत्र्यांचं नाव चर्चेत

कर्नाटकात मुख्यमत्री बदलाच्या निर्णयानंतर भाजपनं गुजरातमध्येही नेतृत्वात बदल केला आहे. मुख्यमंत्री विजय रुपाणी यांनी आज राज्यपाल आचार्य देवव्रत यांची भेट घेऊन पदाचा राजीनामा सादर केला.

राजीनामा दिल्यानंतर माध्यमांशी बोलताना रुपाणी म्हणाले, ‘जे.पी. नड्डा यांचं मार्गदर्शन माझ्यासाठी महत्त्वपूर्ण राहिलं. आता मला जी जबाबदारी दिली जाईल, ती पार पाडण्याचं काम करेन’, असं रुपाणी यांनी सांगितलं.

‘मी पद नाही, तर जबाबदारी म्हणतोय. मला जी जबाबदारी देण्यात आली होती. ती मी पार पाडली आहे. आम्ही गुजरातमध्ये नरेंद्र मोदी यांच्या नेतृत्वाखाली निवडणुका लढलो. २०२२ मधील विधानसभा निवडणुकही मोदींच्याच नेतृत्वाखाली लढली जाईल’, रुपाणी माध्यमांशी बोलताना म्हणाले.

‘गुजरातचा मुख्यमंत्री म्हणून सेवा करण्याची संधी दिल्याबद्दल मी भाजपचा आभारी आहे. पंतप्रधान नरेंद्र मोदी यांच्या नेतृत्वाखाली मला माझ्या कार्यकाळात गुजरातच्या विकासात भर टाकण्याची संधी मला मिळाली’, असंही रुपाणी यावेळी म्हणाले.

विजय रुपाणी यांनी २६ डिसेंबर २०१७ रोजी दुसऱ्यांदा मुख्यमंत्री पदाची शपथ घेतली होती. २०१७ मध्ये झालेल्या विधानसभा निवडणुकीत भाजपने १८२ पैकी ९९ जागा जिंकल्या होत्या. मात्र गुजरातमध्ये विधानसभा निवडणुकांना एका वर्षाचा अवधी बाकी असतानाच त्यांनी राजीनामा दिल्यानं चर्चा सुरू झाली आहे.

नेतृत्व बदलाची सुरू होती चर्चा

काही दिवसांपूर्वी केंद्रीय गृहमंत्री अमित शाह यांनी गुजरातचा दौरा केला होता. त्यांच्या दौऱ्याआधीपासूनच गुजरातमध्ये नेतृत्व बदल होण्याची चर्चा सुरू झाली होती. गुरूवारी रात्री अमित शाह आपल्या बहिणीच्या घरी गेले होते. त्यामुळे कौटुंबिक कारणामुळे दौऱ्यावर असल्याचंही बोललं जात असतानाच मुख्यमत्री रुपाणी यांनी राजीनामा दिला. त्यामुळे शाह यांच्या दौऱ्यात राजकीय घडामोडी घडल्याचं दिसत आहे.

चंद्रकांत पाटलांसह ही नावं स्पर्धेत…

विजय रुपाणी यांनी राजीनामा दिल्यानंतर उद्या भाजप आमदारांची बैठक बोलवण्यात आल्याचं वृत्त आहे. या बैठकीत पुढील मुख्यमंत्र्यांच्या नावावर शिक्कामोर्तब केलं जाईल. मुख्यमंत्री पदाच्या शर्यतीत सध्या गुजरात भाजपचे प्रदेशाध्यक्ष सीआर पाटील, गुजरातचे उपमुख्यमंत्री नितीन पटेल, केंद्रीय आरोग्य मंत्री मनसुख मांडविया, केंद्रीय मंत्री पुरुषोत्तम रुपाला यांची नावं असल्याचं बोललं जात आहे.