SambhajiRaje: आम्ही अपक्षाला पाठिंबा देणार नाही, मग ते.. ही उद्धवजींच्या ‘मन की बात’: राऊत

मुंबई: ‘आम्ही अपक्षाला पाठिंबा देणार नाही. मग ते कोणीही असो. ये मेरे ‘मन की बात’ नही है.. ये उद्धवजी के मन की बात है.’ अशी प्रतिक्रिया शिवसेना नेते संजय राऊत यांनी माध्यमांना दिली आहे. राज्यसभा निवडणुकीसाठी संभाजीराजे जर शिवसेनेत प्रवेश करणार असतील तरच त्यांना शिवसेनेची मतं मिळतील अपक्षाला शिवसेना मतदान करणार नाही. अशी रोखठोक भूमिका आता शिवसेनेने घेतली आहे.

संभाजीराजे यांनी शिवसेनेत यावं यासाठी त्यांच्यासोबत शिवसेनेच्या नेत्यांची बैठकही पार पडली होती. मात्र, असं असलं तरीही अद्याप संभाजीराजे हे शिवसेनेत येण्यासाठी तयार नसल्याचं समजतं आहे. अशा वेळी शिवसेना देखील आपल्या मतावर ठाम आहे.

संजय राऊत नेमकं काय म्हणाले?

‘मला काही माहित नाही.. संभाजीराजेंनी प्रस्ताव स्वीकारला की नाही. नंबर एक म्हणजे हा काही प्रस्ताव नव्हता. शिवसेना दोन जागा लढवणार आहे. शिवसेनेनं दोन जागा लढवणं हा काही राजकीय अपराध नाही. शिवसेना हा एक राजकीय पक्ष आहे. शिवसेना हे मराठी माणूस आणि हिंदुत्वाचं फार मोठं संघटन आहे. महाराष्ट्रात शिवसेनेचा मुख्यमंत्री आहे. अशा वेळेला राज्यसभेच्या ज्या निवडणुका होत आहेत त्यातील दोन जागा या शिवसेना लढते आहे.’

‘दोन्ही ठिकाणी शिवसेनेचे उमेदवार आम्ही देऊ आणि निवडून आणू ही शिवसेनेची भूमिका आहे. कोल्हापूरचे संभाजीराजे छत्रपती यांनी अपक्ष लढण्याची घोषणा केली आहे. ज्याअर्थी एखादा उमेदवार लढणार असं सांगतो तेव्हा मला असं वाटतं की, तेव्हा त्यांच्याकडे निवडून येण्यासाठी लागणाऱ्या मतांची व्यवस्था त्यांनी केलेली असेल. किती मतं लागतात तर 42.’

‘ज्याअर्थी संभाजीराजे यांनी निवडणूक लढविण्याची घोषणा केलेली आहे त्याअर्थी त्यांनी 42 मतांची बेगमी केलेली असणार. त्यांना कोणी तरी पाठिंबा देत असेल. कारण ते अपक्ष लढणार म्हणतायेत. अशा वेळेला आम्ही त्यात पडणं गरजेचं नाही. ते स्वतंत्र व्यक्तिमत्व आहे.’

‘इथे असं लक्षात येत आहे की, त्यांच्याकडे मतं नाहीएत. मतं नाहीएत तर त्यांनी आमच्याकडे मतं मागितली. आता आम्ही कशी मतं देणार? आम्हाला शिवसेनेचा उमेदवार निवडून आणायचा आहे. अपक्ष नाही.’

‘राज्यसभेत शिवसेनेचा एक खासदार वाढवणं आम्हाला गरजेचं आहे. तुम्ही थोडंसं एक पाऊल पुढे या आम्ही दोन पावलं मागे जाऊ. तुम्ही छत्रपती आहात. आता निर्णय त्यांचा आहे. पण.. कोणत्याही परिस्थितीत दोन शिवसेनेचेच दोन उमेदवार निवडून येतील आणि ते पक्के शिवसैनिक असतील.’

‘मी असं म्हणतोय की, माननीय उद्धव ठाकरे यांच्या वतीने मी सांगतोय. ये मेरे ‘मन की बात’ नही है.. ये उद्धवजी के मन की बात है.’

‘आम्ही शिवसेनेच दोन उमेदवार निवडून आणू. जर आमच्यासोबत कोणाला यायचं असेल तर आम्ही विचार करु. विरोध नाही… आमचा विरोध नाही. या आमच्या जागा आहेत. जागा आमच्या आहेत. उलट आमच्याकडून एक पाऊल पुढे जात आहे.’

‘आमच्या दोन जागा निवडून येतील एवढंच मी म्हणतोय. इथे कोणाला विरोध करावा कोणाला पाठिंबा द्यावा हा विचार नाही.’ अशी स्पष्ट भूमिका संजय राऊत यांनी घेतली आहे. त्यामुळे आता संभाजीराजे हे शिवसेनेत प्रवेश करणार का? हे पाहणं महत्त्वाचं ठरणार आहे.