Maharashtra Politics : राज ठाकरेंची साथ सोडणारा नेता उद्धव ठाकरेंच्या शिवसेनेत!

Kirtikumar Shinde : राज ठाकरे यांनी महायुतीला पाठिंबा दिल्यानंतर नाराज झालेल्या कीर्तिकुमार शिंदे यांनी ठाकरेंच्या शिवसेनेत प्रवेश केला आहे. कीर्तिकुमार शिंदे यांनी राज ठाकरेंच्या भूमिकेवर नाराजी व्यक्त करत मनसेचा राजीनामा दिला होता. उद्धव ठाकरे यांच्या उपस्थितीत मातोश्री येथे शिंदे यांनी शिवसेनेत प्रवेश केला होता. (Kirtikumar Shinde Joined Uddhav Thackeray led Shiv Sena) 

कीर्तिकुमार शिंदे यांनी सोशल मीडियावर पक्षप्रवेशाचे फोटो शेअर केले आहे. फोटो शेअर करताना शिंदे यांनी उद्धव ठाकरे आणि महाविकास आघाडीबद्दल त्यांच्या भावना मांडल्या आहेत. 

शिवसेनेत (उद्धव बाळासाहेब ठाकरे) प्रवेश केल्यानंतर शिंदे यांची पोस्ट

"मला शिवसेनेत कोणतं पद मिळेल, याबाबत एका शब्दाचीही चर्चा न करता उद्धवजी ठाकरे आणि युवा नेते आदित्यजी ठाकरे यांच्या नेतृत्वावर संपूर्ण विश्वास ठेवून मी शिवसेनेत प्रवेश केला आहे." 

"शिवसेनेचे पक्षप्रमुख सन्माननीय श्री. उद्धवजी बाळासाहेब ठाकरे यांच्या प्रमुख उपस्थितीत आज मी 'मातोश्री' येथे शिवसेनेत प्रवेश केला. उद्धवजी यांनी मला शिवबंधन बांधले. विशेष म्हणजे, अनेक वर्षांपूर्वीच्या आमच्या भेटीचा त्यांनी आठवणीने उल्लेख केला आणि त्यांच्या मनातील एक विषयही आवर्जून मला सांगितला."

"मला शिवसेनेत कोणतं पद मिळेल, याबाबत एका शब्दाचीही चर्चा न करता उद्धवजी ठाकरे आणि युवा नेते आदित्यजी ठाकरे यांच्या नेतृत्वावर संपूर्ण विश्वास ठेवून मी शिवसेनेत प्रवेश केला आहे. आज देशातील २८ राज्ये आणि ८ केंद्रशासित प्रदेश- सगळीकडेच अनेक राजकीय पक्षांचे पुढारी हुकूमशाही मनोवृत्तीच्या भाजप-मोदी-शाह यांच्यासमोर अक्षरशः लोटांगण घालत असताना सन्माननीय श्री. उद्धवजी बाळासाहेब ठाकरे यांची शिवसेना मात्र भाजपविरोधात संघर्ष करत महाराष्ट्राचा- मराठी माणसाचा स्वाभिमानी बाणा जपत आहे."

"सर्व समाजघटकांना स्वाभिमानाच्या आणि समतेच्या लढ्यातील सोबती मानणारे प्रबोधनकार ठाकरे यांचे व्यापक बहुजनवादी हिंदुत्व, शिवसेनाप्रमुख बाळासाहेब ठाकरे यांनी तळागाळापर्यंत बांधलेली शि व से ना ही चार अक्षरांची अत्यंत बळकट 'जादुई' संघटना आणि सर्वात महत्त्वाचं म्हणजे हुकूमशाह 'भामोशा' विरोधातील आपली परखड राजकीय भूमिका महाराष्ट्रभर पोहोचवण्यासाठी स्वतः उद्धवजी घेत असलेले अतुलनीय, कठोर परिश्रम यांमुळे लोकसभा निवडणुकीत ही सच्ची शिवसेना आणि महविकास आघाडी दणदणीत यश तर मिळवेलच, पण त्याच बरोबर देशाच्या राजकारणालाही नवीन दिशा देईल याबाबत माझ्या मनात तिळमात्र शंका नाही", असे कीर्तिकुमार शिंदे यांनी पोस्टमध्ये म्हटले आहे.