महाराष्ट्रातील भाजपच्या 'या' मंत्र्याच्या पुतणीची थेट स्वीडनच्या खासदारपदी निवड!

नीला यांचा महाराष्ट्राशी जुना संबंध आहे. त्यांचे कुटुंब राज्याच्या राजकारण आणि शिक्षण क्षेत्रात सक्रिय आहे. त्यांचे आजोबा, बाळासाहेब विखे-पाटील, माजी केंद्रीय मंत्री होते. त्यांचे वडील, अशोक विखे पाटील, शिक्षणतज्ज्ञ आहेत. तिचे काका, राधाकृष्ण विखे-पाटील, महाराष्ट्र सरकारमध्ये मंत्री आहेत.

महाराष्ट्रातील अहमदनगरमध्ये घालवलं बालपण

नीला यांचा जन्म स्वीडनमध्ये झाला. तथापि, त्यांचे सुरुवातीचे बालपण महाराष्ट्रातील अहमदनगरमध्ये गेले. नंतर त्या स्वीडनला परतल्या, जिथे त्यांनी आपली राजकीय कारकीर्द घडवली.

निवडणूक जिंकल्यानंतर, नीलाने आपले आजोबा, बाळासाहेब विखे पाटील यांची आठवण काढली. त्यांना आपला अभिमान वाटला असता, अशी आशा त्यांनी व्यक्त केली. नीलाने आठवण सांगितली की, जेव्हा त्या 15 वर्षांच्या होत्या, तेव्हा त्यांचे आजोबा त्यांना राज्याचा अर्थसंकल्प वाचायला देत असत.

नीला अनेक वर्षांपासून स्वीडिश राजकारणात सक्रिय आहेत. माजी पंतप्रधान स्टीफन लोफवेन यांच्या कार्यकाळात त्यांनी पंतप्रधान कार्यालयात सल्लागार म्हणून काम केले होते. तिथे त्यांनी वित्त, कर आणि गृहनिर्माण यांसारख्या विषयांवर काम केलेले.

त्यानंतर नीला स्टॉकहोम सिटी कौन्सिलवर निवडून आल्या. त्यांनी ग्रीन पार्टीच्या निवडणूक समितीवरही काम केले. त्या स्वीडिश यंग ग्रीन्स आणि ग्रीन पार्टीच्या इतर गटांशी संबंधित आहेत. नीलाने गोटेबर्ग स्कूल ऑफ बिझनेसमध्ये अर्थशास्त्र आणि कायदा या विषयांमध्ये पदवी घेतली असून, तिच्याकडे एमबीएची पदवीदेखील आहे. तिने माद्रिदच्या कॉम्प्लुटेन्स युनिव्हर्सिटीमध्येही शिक्षण घेतले आहे.

मुले आणि पर्यावरणासाठी काम करणार

खासदार झाल्यावर नीलाला मुलांचे कल्याण आणि पर्यावरणाशी संबंधित विषयांवर लक्ष केंद्रित करायचे आहे. जे मतदान करू शकत नाहीत त्यांचा आवाज बनायचे आहे आणि स्टॉकहोम व स्वीडनसाठीही योगदान द्यायचे आहे, असे ती म्हणाली.

नीलाने भारताशी असलेल्या तिच्या संबंधांबद्दलही सांगितले. ती म्हणाली की, तिचे भारतावर खूप प्रेम आहे आणि या देशाशी तिचे घट्ट नाते आहे. तिचे अनेक जवळचे भारतीय मित्रही आहेत.

नीलाच्या कुटुंबाचा महाराष्ट्रातील राजकारण आणि शिक्षण, तसेच सहकारी चळवळीशी दीर्घकाळ संबंध आहे. तिचे पणजोबा, विठ्ठलराव विखे पाटील यांनी आशियातील पहिला सहकारी साखर कारखाना स्थापन केलेला. नीलाने तिच्या आजोबांसोबतच्या नात्याची आठवणही सांगितली. ती म्हणाली की, तिच्या आजोबांनी त्यांच्या शेवटच्या वर्षांमध्ये तिला जवळजवळ दर आठवड्याला फोन केला होता. तिला त्यांची खूप आठवण येते, असे ती म्हणाली.

स्वीडनमध्ये विरोधी पक्षांना अल्प बहुमत

स्वीडनच्या निवडणुकीत चार डाव्या विचारसरणीच्या विरोधी पक्षांनी 176 जागा जिंकल्या. सध्याच्या पुराणमतवादी सरकारला पाठिंबा देणाऱ्या पक्षांनी 173 जागा जिंकल्या, त्यामुळे विरोधी पक्षांकडे केवळ तीन जागांचे अंतर राहिले.

निकालानंतर पंतप्रधान उल्फ क्रिस्टरसन यांनी आपल्या राजीनाम्याची घोषणा केली. माजी पंतप्रधान मॅग्डालेना अँडरसन यांचा सोशल डेमोक्रॅट्स पक्ष 99 जागांसह सर्वात मोठा पक्ष म्हणून उदयास आला. तथापि, विरोधी पक्षांमध्ये अनेक मुद्द्यांवर मतभेद आहेत. त्यामुळे, नवीन सरकार स्थापन करण्यासाठी अँडरसन यांना विविध पक्षांशी वाटाघाटी कराव्या लागतील.