जरांगे भेटीवरून आरोप, सत्तारांनी शिरसाटांचं नाव घेत केला पलटवार

आणखी सात-आठ दिवस रुग्णालयात राहण्याचा सल्ला

अब्दुल सत्तार म्हणाले की, आपण गेल्या 25 वर्षांपासून जरांगे यांना ओळखतो आणि त्यांच्या विविध विषयांवर चर्चा करत आलो आहोत. जरांगे यांची तब्येत लवकरात लवकर सुधारावी, अशी प्रार्थनाही त्यांनी केली. डॉक्टरांनी आणखी सात-आठ दिवस रुग्णालयात राहण्याचा सल्ला दिल्याचे सत्तार यांनी सांगितले. जरांगे घरी गेल्यानंतर त्यांची भेट घेण्याचा आपला विचार होता, मात्र त्यांच्या प्रकृतीची माहिती घेतल्यानंतर आपण त्यांना भेटण्यासाठी आलो, असे त्यांनी सांगितले. याआधीही जरांगे यांनी काही नेत्यांवर आरोप केल्यानंतर त्याचा खुलासा करण्यासाठी आपण त्यांच्याशी चर्चा केली होती, असे सत्तार यांनी स्पष्ट केले.

बिनबुडाचे आरोप करणाऱ्यांविरोधात कायदेशीर कारवाई करण्याचा इशारा

दरम्यान, आंदोलन सुरू होण्यापूर्वी अब्दुल सत्तार यांनी जरांगे यांना सात कोटी रुपये दिले आणि संजय शिरसाट यांना पालकमंत्रिपदावरुन काढण्यासाठी हा व्यवहार झाल्याचा आरोप त्यांच्यावर करण्यात आला. या आरोपावर बोलताना सत्तार यांनी आपल्याला पालकमंत्री व्हायचे नसल्याचे स्पष्ट केले. जरांगे पाटील यांच्यासारख्या व्यक्तीला पैसे देऊन विकत घेण्याचा प्रश्नच येत नाही, असेही ते म्हणाले. जरांगे यांना बदनाम करण्यासाठी आपल्या नावाचा वापर केला जात असल्याचा आरोप सत्तार यांनी केला. संजय शिरसाट हे आपले मित्र असून ते आपल्या पक्षाचे पालकमंत्री म्हणून काम करत आहेत, असेही त्यांनी सांगितले. मात्र, कोणाच्याही बोलण्यावर जरांगे विश्वास ठेवतील का, असा सवाल त्यांनी उपस्थित केला.

खोटे आणि बिनबुडाचे आरोप करणाऱ्यांविरोधात कायदेशीर कारवाई करण्याचा इशाराही अब्दुल सत्तार यांनी दिला. याबाबत आपण वकिलांशी बोलणार असल्याचे त्यांनी सांगितले. शासनाच्या कोणत्याही यंत्रणेकडून या आरोपांची चौकशी झाली तरी आपली तयारी असल्याचे सत्तार यांनी म्हटले. सहा कोटी, आठ कोटी, हजार कोटी अशा रकमेचे आरोप केले जात असून, अशा आरोपांमुळे संभ्रम निर्माण करण्याचा प्रयत्न होत असल्याचे त्यांनी सांगितले. जरांगे पाटील यांच्या आंदोलनाला बदनाम करण्याचे हे षडयंत्र असल्याचे आपल्याला वाटत असल्याचे सत्तार म्हणाले. जरांगे पाटील यांच्या प्रकृतीबाबत आणि त्यांना बदनाम करण्याचा प्रयत्न करू नये, अशी विनंतीही त्यांनी माध्यमांच्या माध्यमातून केली.