निलेश राणेंना मोठा दणका, भाजप कार्यकर्त्याच्या घरात घुसणे महागात पडले, पोलिसांकडून मोठी कारवाई

मालवण नगरपालिका काबीज करण्यासाठी भाजपकडून जोरदार तयारी सुरू आहे. याच दरम्यान, गुरुवारी आमदार निलेश राणे काही कार्यकर्त्यांसह भाजप पदाधिकारी विजय केनवडेकर यांच्या घरी अचानक पोहोचले. त्यांच्या अनपेक्षित आगमनामुळे घरातील कार्यकर्त्यांमध्ये गोंधळ उडाला. घरात जाण्यापूर्वी राणे म्हणाले,“मी कुणाच्या बेडरूममध्ये जाणार नाही, जे आत आहे ते बाहेर काढा.”

तथापि, कार्यकर्त्यांनी त्यांना आत नेल्यानंतर बेडरूममध्ये मोठ्या रकमेची पैशांनी भरलेली बॅग आढळल्याचा दावा करण्यात आला. पाचशे रुपयांच्या नोटांचे बंडल बॅगेत दिसत असल्याचे व्हिडिओमध्येही दिसत असल्याचा दावा राणेंनी केला. या घटनेने निवडणूक परिसरात मोठी चर्चा सुरू झाली.

हेही वाचा : '.. उद्योगपतींचे दलाल', नाशकात 1800 झाडं तोडण्याचा निर्णय कशासाठी? राज ठाकरेंनी कारणं सांगितली

राणेंसह चौघांवर गुन्हा दाखल

या घटनेनंतर भाजप पदाधिकारी विजय केनवडेकर यांनी मालवण पोलीस ठाण्यात आमदार राणे आणि त्यांच्यासोबत असलेल्या व्यक्तींविरोधात तक्रार दाखल केली. त्यानुसार खालील कलमांनुसार गुन्हा नोंदविण्यात आला आहे:

189(1) – बेकायदेशीर जमाव

189(2) – सार्वजनिक शांतता भंग

329(4) – चोरीच्या उद्देशाने घरात प्रवेश

356(2) – मानहानी

यामुळे या प्रकरणाचे गांभीर्य आणखी वाढले असून राणेंसह चौघांवर कारवाईची प्रक्रिया सुरू झाली आहे.

ज्यांच्या घरी ही रोकड सापडल्याचा दावा केला जात आहे, ते विजय केनवडेकर भाजपचे अधिकृत पदाधिकारी आहेत. राणेंनी माध्यमांसमोर केनवडेकर यांचा भाजप प्रदेशाध्यक्ष रवींद्र चव्हाण यांच्यासह असलेला फोटोही प्रदर्शित केला. त्यानंतर त्यांनी तातडीने स्थानिक पोलीस आणि निवडणूक अधिकाऱ्यांना बोलावून पैसे जप्त करण्याची मागणी केली. राणेंचा दावा आहे की, “ही एकच बॅग नाही. घरात अजून पैसे लपवले आहेत.”

निलेश राणेंचे गंभीर आरोप

राणेंनी भाजपवर निवडणुकीपूर्वी पैसे वाटप सुरू केल्याचा आरोप केला. ते म्हणाले, “मालवणमध्ये 25 लाखांची रोकड सापडली आहे. काल रवींद्र चव्हाण इथे आले आणि त्यानंतरच पैशांचे वितरण सुरू झाले. मैदानात प्रामाणिकपणे लढा; अशा प्रकारे पैसे वाटप करून निवडणूक लढवण्याची पद्धत आहे का?” त्यांनी पुढे दावा केला की, मालवणमधील 8 ते 10 ठिकाणी 25 ते 50 लाख रुपये ठेवले असल्याची माहिती त्यांच्याकडे आहे आणि प्रशासनाने सर्व ठिकाणी छाननी करावी. या प्रकरणामुळे निवडणूक लढाईला एक नाट्यमय वळण मिळाले आहे. एका बाजूला राणेंचे आरोप तर दुसऱ्या बाजूला त्यांच्याविरुद्ध दाखल झालेला गुन्हा यामुळे मालवणमधील निवडणूक आणखी चुरशीची झाली आहे. पोलिसांनीही सखोल तपास सुरू केला असून पुढील घडामोडींवर सर्वांचे लक्ष लागले आहे.

इतर महत्त्वाच्या बातम्या 

'धरण, नदी, डोंगर, सगळं फोनवरुन मंजूर..', बाळासाहेब थोरातांनी एकनाथ शिंदेंची खिल्ली उडवली, नेमकं काय घडलं?