सांगली जिल्हा बँकेचा पहिला निकाल जाहीर; गोपीचंद पडळकरांचा मोठा विजय; किती मतं मिळवली?

हेही वाचा : Maharashtra Weather : राज्यात कुठे काळे ढग, तर कुठे विजांसह पावसाची शक्यता; IMD चा अंदाज

21 जागांपैकी 15 जागा यापूर्वीच बिनविरोध झाल्या

सांगली जिल्हा मध्यवर्ती सहकारी बँकेच्या एकूण 21 जागांपैकी 15 जागा यापूर्वीच बिनविरोध झाल्या आहेत. त्यामुळे उर्वरित सहा जागांसाठी होणाऱ्या निवडणुकीकडे लक्ष लागले होते. या निवडणुकीत भाजपचे आमदार गोपीचंद पडळकर यांना जत सोसायटी गटातून निवडणूक लढवावी लागत असल्याने राजकीय समीकरणांची चर्चा सुरू झाली होती. मुख्यमंत्री देवेंद्र फडणवीस यांनी ही निवडणूक बिनविरोध करण्यासाठी पुढाकार घेतल्याची चर्चा होती. राष्ट्रवादी काँग्रेसचे नेते जयंत पाटील यांनी पत्रकारांशी बोलताना मुख्यमंत्र्यांनी फोन करून निवडणूक बिनविरोध करण्याची इच्छा व्यक्त केल्याचे सांगितले होते. त्यानंतर जयंत पाटील आणि काँग्रेसचे नेते विश्वजीत कदम यांच्याशी चर्चा झाली होती. निवडणुकीच्या शेवटच्या दोन दिवसांत महायुती आणि महाविकास आघाडीच्या नेत्यांमध्ये बैठकांचे सत्र सुरू होते.

हेही वाचा : दिग्गज नेते शाहांच्या भेटीला, पण सुनेत्रा पवारांची अनुपस्थिती कशामुळे? राष्ट्रवादीची पहिली प्रतिक्रिया

गोपीचंद पडळकर यांच्याविरोधात विनोद पवार यांनी लढवली निवडणूक 

मात्र, या चर्चांमध्ये जत सोसायटी गटातील जागेबाबत एकमत होऊ शकले नाही. या गटातून गोपीचंद पडळकर यांच्याविरोधात विनोद पवार यांनी निवडणूक लढवली. विनोद पवार हे जत तालुक्यातील भाजपचे जिल्हा परिषद सदस्य सुनील पवार यांचे बंधू आहेत. पडळकर यांच्या विरोधात स्थानिक पातळीवर समविचारी आघाडी तयार झाली होती. या आघाडीने विनोद पवार यांना उमेदवारी दिली होती. जत सोसायटी गटात एकूण 88 मतदार असल्याने या निवडणुकीला विशेष महत्त्व प्राप्त झाले होते. या मतदारांना आपल्याकडे वळवण्यासाठी दोन्ही बाजूंनी प्रयत्न सुरू असल्याची चर्चा होती. त्यातच पडळकर यांचा उमेदवारी अर्ज छाननीदरम्यान अपात्र ठरवण्यात आला होता. त्यानंतर त्यांनी सर्वोच्च न्यायालयात धाव घेतली. उच्च न्यायालयाच्या आदेशाला स्थगिती मिळाल्यानंतर त्यांची उमेदवारी कायम राहिली होती.

दरम्यान, पडळकर यांच्या विजयामुळे सांगली जिल्हा बँकेच्या निवडणुकीतील पहिला निकाल स्पष्ट झाला आहे. या निवडणुकीत तासगावमधून राष्ट्रवादी काँग्रेसच्या आमदार सुमनताई पाटील यांनाही संजयकाका पाटील यांच्याविरोधात निवडणूक लढवावी लागत आहे. त्यामुळे या लढतीकडेही राजकीय वर्तुळाचे लक्ष लागले आहे. जिल्हा बँकेच्या 21 जागांपैकी 15 जागा बिनविरोध झाल्यानंतर उर्वरित जागांसाठी मतदानाची प्रक्रिया पार पडली. जत सोसायटी गटातून पडळकर यांनी 54 मते मिळवत 20 मतांच्या फरकाने विजय मिळवला. त्यांच्या विरोधातील उमेदवाराला 34 मते मिळाली. आता उर्वरित जागांचे निकाल काय लागतात आणि त्यातून जिल्ह्यातील राजकीय समीकरणांमध्ये कोणते बदल होतात, याकडे लक्ष लागले आहे.