हे ही वाचा : शिवसेनेचा बालेकिल्ला भाजपने कसा हिसकावला?

शिंदे आणि कलानी गठबंधन ठरले अपयशी 

उल्हासनगरचे राजकारण दीर्घकाळ टीम ओमी कलानी आणि पप्पू कलानी यांच्या प्रभावाखाली राहिले आहे. मात्र गेल्या काही वर्षांत सत्ता शिवसेना, भाजप आणि SAI पार्टी यांच्यात विभागली गेली होती. भाजपने कलानी कुटुंबाच्या पाठिंब्याने अडीच वर्षे स्वतंत्रपणेही महापालिकेची सत्ता सांभाळली होती. या निवडणुकीत शिवसेनेने आपल्या महायुतीतील भागीदार भाजपपासून वेगळी वाट निवडली. पक्षप्रमुख व उपमुख्यमंत्री एकनाथ शिंदे यांचे पुत्र आणि खासदार श्रीकांत शिंदे यांनी TOK, RPI आणि SAI पार्टीसोबत आघाडी केली. मात्र मोठे दिग्गज आणि प्रभावशाली स्थानिक नेते असूनही सेना-नेतृत्वाखालील आघाडीला बहुमत मिळवण्यात अपयश आले आहे. 

स्टार प्रचारकांशिवाय भाजपला घवघवीत यश

भाजपसाठीही ही निवडणूक आव्हानात्मक ठरली. वरिष्ठ नेते मुंबईपुरते मर्यादित राहिले. मुख्यमंत्री यांच्या एका सभेव्यतिरिक्त मोठ्या स्टार प्रचारकांचा अभाव जाणवला. तरीसुद्धा स्थानिक नेतृत्व, अनुभवी चेहरे तसेच नवे, सुशिक्षित आणि तरुण उमेदवारांच्या जोरावर भाजपने 2017 च्या तुलनेत चांगली कामगिरी करत प्रथमच मोठ्या संख्येने जागा मिळवल्या आहेत. उल्लेखनीय बाब म्हणजे 2017 मध्ये भाजप+ ला 32 तर शिवसेनेला 25 जागा मिळाल्या होत्या.

हे ही वाचा : धनंजय मुंडेंना दिलासा, 'तो' खटला पुनरुज्जीवित करण्याला कोर्टाची स्थगिती

महापौरपदाची उत्सुकता शिगेला

उल्हासनगरच्या राजकारणात कलानी कुटुंबाचे नाव मोठे मानले जाते. या महापालिका निवडणुकीत टीम ओमी कलानीने उपमुख्यमंत्री एकनाथ शिंदे यांचे पुत्र खासदार श्रीकांत शिंदे यांच्या शिवसेने सोबत आघाडी केली होती. त्यामुळे निकाल अनुकूल लागतील आणि महापौर आमचाच बसणार अशी अपेक्षा व्यक्त केली जात होती. मात्र प्रत्यक्षात उलट चित्र पाहायला मिळाले. भाजपने शिवसेना + TOK + SAI पार्टीच्या आघाडीला जोरदार धक्का देत मोठी आघाडी घेतली आहे. आता महापौरपदावर कोण विराजमान होणार, याची उत्सुकता शिगेला पोहोचली असून सत्तास्थापनेसाठीची लढाई अजूनही सुरू आहे. मात्र मनपा निवडणुकीत शिवसेनेचे खासदार श्रीकांत शिंदे, ओमी कलानी आणि माजी आमदार पप्पू कलानीसह  जीवन इदनानी यांना भाजपने जबरदस्त राजकीय धक्का दिला, हेही तितकेच सत्य आहे.