IPL Transfer Window 2024 : हार्दिक पांड्या मुंबई इंडियन्सचा कर्णधार? रोहित शर्मा बदलणार टीम!

IPL Trading Window 2024 : आयसीसी एकदिवसीय विश्वचषक 2023 स्पर्धा संपली आहे. 19 नोव्हेंबर रोजी झालेल्या अंतिम सामन्यात ऑस्ट्रेलियाने भारतीय संघाचा 6 गडी राखून पराभव करत विजेतेपद पटकावले. या कटू आठवणी मागे टाकत आता क्रिकेटप्रेमींना वेध लागले आहेत, ते इंडियन प्रीमियर लीग (IPL) 2024 च्या हंगामाची. (What is IPL Transfer Window and Rules)

या आयपीएल मोसमाचा लिलाव 19 डिसेंबर रोजी दुबईत होऊ शकतो. पण, यापूर्वीच पहिली ट्रान्सफर विंडो उघडली आहे. या हस्तांतरण विंडोची अंतिम तारीख 26 नोव्हेंबर निश्चित करण्यात आली आहे. त्याला ट्रेडिंग विंडो असेही म्हणतात. या अंतर्गत दोन फ्रँचायझी परस्पर संमतीने त्यांच्या आवडत्या खेळाडूंची खरेदी-विक्री करू शकतात. मात्र, यासाठी खेळाडूचीही परवानगी घ्यावी लागते.

‘या’ खेळाडूंची झाली देवाण-घेवाण

आतापर्यंत दोन खेळाडूंची खरेदी-विक्री झाली आहे. या महिन्यात म्हणजे 3 नोव्हेंबर रोजी, रोमॅरियो शेफर्ड 2024 सीझनसाठी ट्रेड केलेला पहिला खेळाडू ठरला. पाचवेळा चॅम्पियन मुंबई इंडियन्सने शेफर्डला लखनौ सुपरजायंट्सला 50 लाखांमध्ये विकले.

दुसरा करार राजस्थान रॉयल्स (RR) आणि लखनौ फ्रँचायझी यांच्यात झाला. राजस्थानने डावखुरा फलंदाज देवदत्त पडिक्कलच्या जागी वेगवान गोलंदाज आवेश खानला घेण्याचा निर्णय घेतला. दोन्ही संघ आणि खेळाडूंनी हा करार स्वीकारला. बीसीसीआयनेही याला मान्यता दिली आहे.

हेही वाचा >> IPL ऑक्शनआधीच मोठा करार! राजस्थानकडून 10 करोडमध्ये ‘हा’ खेळाडू खरेदी

लखनऊने आयपीएल 2022 च्या मेगा लिलावात 10 कोटी रुपयांची बोली लावून आवेशला खरेदी केले होते. तर राजस्थानने पडिक्कलसाठी 7.75 कोटी रुपये खर्च केले होते. या वर्षी दोन्ही खेळाडूंना त्यांच्या फ्रँचायझीने कायम ठेवले होते, परंतु आता पुढील हंगामापूर्वी बदल दिसून येत आहेत.

पंड्या आणि रोहित यांच्यातही व्यवहार होणार?

मीडिया रिपोर्ट्सनुसार यावेळी आणखी एक मोठी खरेदी-विक्री होऊ शकते. गुजरात टायटन्सचा कर्णधार हार्दिक पंड्या आणि मुंबई इंडियन्सचा कर्णधार रोहित शर्मा यांच्यात हा व्यवहार होऊ शकतो. पांड्या त्याच्या जुन्या संघात म्हणजे मुंबई इंडियन्समध्ये परत येऊ शकतो. तर रोहित शर्मा गुजरात टायटन्स संघात सामील होऊ शकतो.

हेही वाचा >> ICC New Rule : आता संघाला होणार 5 धावांचा दंड, ICC चा 60 सेकंदाचा नवा नियम काय?

म्हणजे दोन्ही संघांच्या कर्णधारांची अदलाबदल होऊ शकते. रोहितच्या नेतृत्वाखाली मुंबईने आतापर्यंत सर्वाधिक 5 वेळा विजेतेपद पटकावले आहे. तर हार्दिकने त्याच्या नेतृत्वाखाली गुजरातला प्रथमच विजेतेपद मिळवून दिले होते.

आता जाणून घ्या ट्रान्सफर विंडोचे नियम

– कोणत्याही एका खेळाडूचा दोन प्रकारे विक्री केली जाऊ शकते. प्रथम, एखाद्याला त्या खेळाडूची फ्रेंचायझी स्वतः विकण्याची ऑफर देऊ शकते. किंवा दुसरे म्हणजे, फ्रँचायझीने खेळाडू विकत घेण्यात स्वारस्य दाखवले पाहिजे.

– एखाद्या खेळाडूची खरेदी वा विक्री करण्यासाठी फ्रँचायझींमध्ये केवळ पैशांबाबत चर्चा व्हायला हवी.

– आयपीएल गव्हर्निंग कौन्सिलची परवानगी नसेल, तर खरेदी-विक्री होऊ शकत नाही. म्हणजेच आयपीएल गव्हर्निंग कौन्सिलचीही मान्यता आवश्यक असते.

हेही वाचा >> World Cup 2027 : पुढचा विश्वचषक होणार खास! कधी, कुठे अन् किती असणार टीम… जाणून घ्या

– एकापेक्षा जास्त फ्रँचायझींनी खेळाडू खरेदी करण्यात रस दाखवला तर संपूर्ण प्रकरण विकणाऱ्या फ्रँचायझीवर अडकते. ती तिच्या आवडीच्या फ्रँचायझीसोबत व्यवहार करू शकते.

– एखाद्या खेळाडूचा व्यापार करण्यापूर्वी किंवा त्याला दुसऱ्या संघाकडे हस्तांतरित करण्यापूर्वी त्याची संमती घेणे आवश्यक आहे. तसेच, फ्रेंचायझी ‘आयकॉन’ खेळाडूचा व्यापार करू शकत नाही.