मुंबई : नववर्षाच्या निमित्ताने मिठाई देण्यासाठी घरी बोलावलं, अन् प्रेयसीने प्रियकराचं गुप्तांग कापलं

नववर्षानिमित्त मिठाई देण्याचे निमित्त अन् प्रियकराचं गुप्तांग कापलं 

या प्रकरणात जोगिंदर लखन महतो (वय 44, रा. जांभळीपाडा) असे जखमी व्यक्तीचे नाव आहे. ते खासगी वाहनचालक म्हणून काम करतात आणि गेल्या 18 वर्षांपासून कुटुंबासह मुंबईत वास्तव्यास आहेत. पोलिस तपासात समोर आलेल्या माहितीनुसार, जोगिंदर यांचे त्यांच्या बहिणीच्या नणंदेशी म्हणजेच कंचनदेवी राकेश महतो (वय 25) हिच्याशी गेल्या सहा ते सात वर्षांपासून प्रेमसंबंध होते. या नात्यातूनच वादाला सुरुवात झाली होती. कंचन हिने जोगिंदर यांच्यावर पत्नीला सोडून आपल्यासोबत राहावे व लग्न करावे, असा सातत्याने दबाव टाकण्यास सुरुवात केली होती. या कारणामुळे जोगिंदर यांच्या घरात वारंवार वाद होत होते. परिस्थिती अधिक चिघळत असल्याचे लक्षात आल्यानंतर जोगिंदर यांनी नोव्हेंबर महिन्यात मुंबई सोडून बिहार गाठले होते. मात्र, त्या काळातही कंचनकडून सतत फोन येत होते. मुंबईत परत येऊन लग्न न केल्यास गंभीर परिणाम भोगावे लागतील, अशी धमकी दिल्याचा आरोप जोगिंदर यांनी पोलिसांकडे केला आहे. 19 डिसेंबर रोजी जोगिंदर पुन्हा मुंबईत परतले. मात्र, त्यांनी कंचनपासून अंतर ठेवण्याचा निर्णय घेतला होता. याच पार्श्वभूमीवर 31 डिसेंबर रोजी रात्री सुमारे दीड वाजण्याच्या सुमारास कंचनने नववर्षानिमित्त मिठाई देण्याचे निमित्त सांगत जोगिंदर यांना आपल्या घरी बोलावले आणि त्याचे गुप्तांग कापले.

पोलिसांच्या माहितीनुसार, मुले झोपल्यानंतर कंचनने स्वयंपाकघरातील भाजी कापण्याचा चाकू घेत जोगिंदरवर अचानक हल्ला केला. या हल्ल्यात त्यांचे गुप्तांग कापण्यात आले. गंभीर जखमी अवस्थेत जोगिंदर कसाबसा आपल्या घरी पोहोचला. घडलेला प्रकार त्यांनी कुटुंबीय व शेजाऱ्यांना सांगितल्यानंतर तातडीने त्यांना प्रथम देसाई रुग्णालयात दाखल करण्यात आले. त्यानंतर प्रकृती चिंताजनक असल्याने पुढील उपचारांसाठी सायन रुग्णालयात हलवण्यात आले. या घटनेची माहिती मिळताच वाकोला पोलिसांनी घटनास्थळी भेट देत पंचनामा केला. जोगिंदर यांच्या तक्रारीवरून आरोपी कंचनदेवी महतो हिच्याविरोधात गंभीर दुखापत केल्याचा आणि धमकी दिल्याचा गुन्हा दाखल करण्यात आला आहे. पोलिसांकडून प्रकरणाचा सखोल तपास सुरू असून आरोपी महिलेला अटक करण्याची प्रक्रिया सुरू असल्याची माहिती देण्यात आली आहे.