14 वर्षीय मुलगी अहिल्यानगरहून मामाकडे निघाली, पण कल्याण रेल्वे स्थानकात बलात्कार

कोणतीही पूर्वओळख नसताना आरोपी सौरभ सोनवणे याने स्थानकावर त्या अल्पवयीन मुलीचा मोबाईल फोन जबरदस्तीने हिसकावून घेतला. अचानक घडलेल्या या प्रकारामुळे ती मुलगी घाबरून गेली आणि तिने आरोपीकडे आपला मोबाईल फोन परत देण्याची विनंती केली. त्यावर आरोपी सौरभ याने जर मोबाईल फोन परत हवा असेल तर माझ्यासोबत पोलीस स्टेशनला चल, असे सांगून तिची जाणीवपूर्वक दिशाभूल केली. मात्र, तिला पोलीस स्टेशनमध्ये नेण्याऐवजी आरोपीने तिला कल्याण रेल्वे यार्डाच्या निर्जन परिसरात नेले. त्या ठिकाणी कोणीही नसल्याचा फायदा घेऊन आरोपी सौरभ याने त्या निष्पाप मुलीवर बळजबरीने लैंगिक अत्याचार केले.

सीसीटीव्हीच्या मदतीने आरोपी पोलिसांच्या जाळ्यात

या भीषण प्रसंगातून स्वतःची कशीबशी सुटका करून घेतल्यानंतर ती अल्पवयीन मुलगी अत्यंत गंभीर आणि घाबरलेल्या अवस्थेत कल्याण रेल्वे पोलीस ठाण्यात (जीआरपी) पोहोचली. तिने घडलेला सर्व प्रसंग आणि आपबिती पोलिसांना सांगितली. या घटनेचे गांभीर्य ओळखून कल्याण जीआरपी पोलिसांनी तात्काळ गुन्हा नोंदवून घेतला आणि तपास यंत्रणा कामाला लावली. पोलिसांनी रेल्वे स्थानक आणि आसपासच्या परिसरातील सीसीटीव्ही (CCTV) फुटेज अत्यंत बारकाईने तपासले. या तांत्रिक तपासाच्या आणि सीसीटीव्ही फुटेजच्या मदतीने पोलिसांनी आरोपीचा माग काढला आणि अवघ्या काही वेळातच संशयित आरोपी सौरभ सोनवणे याला शोधून काढले.

रेल्वे क्राईम ब्रँच आणि जीआरपी पोलिसांची संयुक्त कारवाई

या क्लिष्ट गुन्ह्याचा छडा लावण्यासाठी रेल्वे क्राईम ब्रांच आणि कल्याण जीआरपी पोलिसांनी संयुक्तपणे वेगाने कारवाई केली. पोलिसांनी पीडित मुलीवर लैंगिक अत्याचार करणाऱ्या आरोपी सौरभ सोनवणे याला ताब्यात घेतले असून त्याला अटक करण्यात आली आहे. रेल्वे स्थानकासारख्या गजबजलेल्या ठिकाणी एका अल्पवयीन मुलीची दिशाभूल करून रेल्वे यार्डात अत्याचार केल्याच्या या घटनेमुळे प्रवासी आणि परिसरात एकच खळबळ उडाली आहे. कल्याण पोलिसांनी या प्रकरणाची अत्यंत गंभीर दखल घेतली असून कायद्यानुसार पुढील कडक कायदेशीर तपास आणि चौकशी सुरू केली आहे.