Maharashtra Weather: रत्नागिरी, सिंधुदुर्गात पुन्हा वाढणार पावसाचा जोर, हवामान खात्याकडून अलर्ट जारी

हवामानाचा अंदाज

1. कोकण आणि मुंबई:

कोकणातील रत्नागिरी, सिंधुदुर्ग, ठाणे, रायगड आणि मुंबई परिसरात 23 ऑगस्टला मध्यम ते मुसळधार पाऊस पडू शकतो असा अंदाज वर्तवण्यात आला आहे. हवामान खात्याने येलो अलर्ट देखील जारी केला आहे. मुंबईत मागील दोन दिवसांपासून पावसाचा जोर कमी झाला आहे, परंतु आज (23 ऑगस्ट) रिमझिम ते मध्यम पावसाच्या सरी अपेक्षित आहेत. यामुळे शहरातील काही भागांत पाणी साचण्याची शक्यता आहे.

हे ही वाचा>> Personal Finance: जर मला काही झाले तर माझ्या कुटुंबाचे काय होईल? या प्रश्नाचे साधे आणि सरळ उपाय

2. विदर्भ:

विदर्भातील नागपूर, चंद्रपूर, गडचिरोली, यवतमाळ, वर्धा आणि अमरावती या जिल्ह्यांमध्ये मुसळधार पावसाचा अंदाज आहे. 23 ऑगस्टला देखील याच भागात जोरदार पावसाची शक्यता आहे. त्यामुळे हवामान खात्याने या भागासाठी ऑरेंज अलर्ट जारी केला आहे.

3. मराठवाडा:

मराठवाड्यातील लातूर, धाराशिव, परभणी, हिंगोली, नांदेड आणि बीड येथे हलका ते मध्यम पाऊस पडण्याची शक्यता आहे. काही ठिकाणी विजांच्या कडकडाटासह पावसाच्या सरी अपेक्षित आहेत. यंदा मराठवाड्यात सरासरीपेक्षा जास्त पाऊस पडण्याचा अंदाज असल्याने शेतकऱ्यांना दिलासा मिळण्याची शक्यता आहे.

हे ही वाचा>> मुंबईची खबर: गणेशोत्सवासाठी तब्बल 474 कोटी रुपयांचा विमा! पुजारी, स्वयंपाकी, मंडप... नेमकं काय-काय केलं कव्हर?

4. पश्चिम महाराष्ट्र:

पुणे, सातारा, सांगली, सोलापूर आणि कोल्हापूर येथे तुरळक ठिकाणी हलक्या ते मध्यम पावसाची शक्यता आहे. पुण्यात 22 ऑगस्टला ढगाळ वातावरण आणि रिमझिम पाऊस नोंदवला गेला, आणि 23 ऑगस्टला देखील असाच अंदाज आहे. सांगली आणि सोलापूरसाठी येलो अलर्ट जारी करण्यात आला आहे.

5. उत्तर महाराष्ट्र:

अहमदनगर, नाशिक आणि जालना येथे हलक्या पावसाच्या सरींची शक्यता आहे. या भागात पावसाचा जोर कमी असेल.

इशारा: कोकण आणि विदर्भातील काही भागात मुसळधार पावसामुळे पूरस्थिती निर्माण होण्याचा धोका आहे. स्थानिक प्रशासनाला सतर्क राहण्याचे निर्देश देण्यात आले आहेत. पूर परिस्थिती टाळण्यासाठी नद्या आणि नाल्यांजवळील भागात सतर्कता बाळगा आणि आपत्कालीन व्यवस्थापनाची तयारी ठेवण्याचेही आदेश देण्यात आले आहेत.