रमजानच्या महिन्यात टोळ्या सक्रिय

विशेषतः रमजानच्या महिन्यात अशा भिकारी टोळ्या दुबई आणि शारजाह सारख्या शहरांमध्ये अधिक सक्रिय होतात. 'खलिज टाईम्स'च्या वृत्तानुसार, दुबई पोलिसांनी दोन दिवसांपूर्वी भीक मागणाऱ्या अशाच एका टोळीच्या म्होरक्यासह 13 जणांना अटक केली आहे. दुबईच्या गुन्हे अन्वेषण विभागाचे संचालक ब्रिगेडियर अली सालेम अल शम्सी यांनी सांगितले की, या अटक 'भीक मागण्याविरुद्ध मोहीमे'अंतर्गत करण्यात आल्या आहेत. त्यांनी माहिती दिली की, एका अशा भिकाऱ्यालाही दुबई पोलिसांनी पकडले आहे ज्याच्याकडे तीन लक्झरी कार होत्या.

हे ही वाचा : Personal Finance: कोणत्याही Warning शिवाय बँका तुमचं Account गोठवू शकतं, कारण...

शिफ्टमध्ये भीक मागण्याचे काम

त्याने लोकांकडे मदत मागून मोठी रक्कम जमा केली होती. अधिकाऱ्याच्या म्हणण्यानुसार, तो व्यक्ती शिफ्टमध्ये भीक मागण्याचे काम करायचा. आपली शिफ्ट संपल्यानंतर तो आपला वेश बदलायचा आणि एका महागड्या गाडीतून फिरायला निघायचा. पोलिसांनी यापूर्वीही अशा काही भिकाऱ्यांना अटक केली आहे, ज्यांच्याकडे मोठ्या प्रमाणात रोख रक्कम सापडली होती. काही दिवसांपूर्वी दुबईतील एका पार्किंग एरियातून एका भिकाऱ्याला अटक करण्यात आली होती. जेव्हा त्याला पकडले गेले, तेव्हा त्याच्याकडे 20 हजार दिरहाम म्हणजेच साधारणत: 15 लाख भारतीय रुपये होते, जे त्याने फक्त दोन-तीन दिवसांत भीक मागून कमावले होते. तो ट्रॅफिक सिग्नलवर लक्झरी कार मालक आणि वाहन चालकांना लक्ष्य करत होता आणि आपल्याला जेवणासाठी पैशांची गरज असल्याचा दावा करत होता. 

लाखो रुपयांची कमाई

रमजान सुरू होताच देशभरात अशा प्रकारच्या घटना समोर आल्या आहेत. याआधी, रास अल खैमाह पोलिसांनी रमजान दरम्यान 19 भिकाऱ्यांना अटक केली होती. यापैकी एका भिकाऱ्याकडे 11 हजार दिरहाम म्हणजेच 8 लाख रुपये सापडले होते. ही कमाई देखील फक्त दोन-तीन दिवसांचीच होती.

अशाच प्रकारे गेल्या वर्षी शारजाह पोलिसांनी एका भिकाऱ्याला अटक केली होती, ज्याने अवघ्या तीन दिवसांत 14 हजार दिरहाम म्हणजेच 10 लाख रुपयांहून अधिक रक्कम जमा केली होती. त्याला एका मशिदीजवळ भीक मागताना पकडण्यात आले होते. तो आर्थिक टंचाईचे कारण सांगून लोकांकडे भीक मागत असे. तपासात असे समोर आले की, तो देशात बेकायदेशीरपणे राहत होता आणि त्याने अवघ्या तीन दिवसांत भीक मागून 14 हजार दिरहाम जमा केले होते.

हे ही वाचा : Astrology : आज शनीचा अस्त होणार, पुढील 35 दिवस 'या' राशीच्या लोकांनी सतर्क रहा; अन्यथा..

भीक मागणे गुन्हा 

तसेच, दुबई पोलिसांनी गेल्या वर्षी रमजानच्या महिन्यात फेसबुकवर एक व्हिडिओ पोस्ट केला होता, ज्यामध्ये एक व्यक्ती रस्त्यावर भीक मागताना दिसत होती. लोक त्याला पैसे देण्यासाठी स्वतःहून त्याच्याकडे येत होते. पोलिसांनी धक्कादायक बाब ही सांगितली की, त्याने केवळ एका तासात 367 दिरहाम म्हणजेच 27 हजार रुपये गोळा केले होते. यूएई पोलीस लोकांमध्ये याविषयी जागरूकता पसरवत आहेत की, कसे रस्त्यावर भीक मागणारे लोक खरोखर गरजू नसतानाही लोकांकडून पैसे मागून मोठी रक्कम कमवू शकतात. विशेषतः रमजानच्या पवित्र महिन्यादरम्यान अशा लोकांची संख्या बरीच वाढते. दरम्यान, यूएईमध्ये भीक मागणे हा गुन्हा असून त्यासाठी 50 हजार दिरहामपर्यंत दंड आकारला जातो.