टॅगलाईनमुळे वेगळी रंगत

‘तेच सगळे कामेरकर, पुन्हा एकदा 10 वर्षांनंतर… त्यांच्यातले काही गेले, काही राहिले… गेलेले हसतायत आणि राहिलेले…!’ अशा मिश्किल शब्दांत ‘व्हेंटिलेटर 2’ची घोषणा करण्यात आली आहे. ‘घ्या रे घ्या सारे घ्या…’ या खास अंदाजातील टॅगलाईनमुळे चित्रपटाच्या घोषणेला आणखी एक वेगळी रंगत आली असून यावेळी कथा नेमकी काय असेल, पहिल्या चित्रपटातील नात्यांचा गोडवा, कौटुंबिक गंमतीजंमती आणि भावनिक क्षण पुन्हा अनुभवायला मिळणार का, याची उत्सुकता आता प्रेक्षकांना लागली आहे.

दिग्दर्शक राजेश मापुस्कर म्हणतात, “‘व्हेंटिलेटर’ चित्रपटासोबत माझ्या अनेक आठवणी आणि भावना जोडल्या आहेत. या चित्रपटाला प्रेक्षकांनी दिलेलं प्रेम आजही मनात ताजं आहे. दहा वर्षांनंतर पुन्हा एकदा त्याच विश्वात परतताना एक वेगळाच आनंद आणि जबाबदारीची जाणीव आहे. लवकरच हा चित्रपट प्रेक्षकांच्या भेटीला घेऊन येत आहोत.”

हे ही वाचा : विलीनीकरणाला विरोध, चर्चा फेटाळून लावत रोहित पवार जे म्हणाले ते ऐकाच!

प्रियांका चोप्रा काय म्हणाल्या?

निर्मात्या प्रियंका चोप्रा जोनस आणि डॉ. मधु चोप्रा म्हणतात, “‘व्हेंटिलेटर’ला मिळालेलं प्रेम आमच्यासाठी नेहमीच खास राहिलं आहे. या चित्रपटाने प्रेक्षकांच्या मनात एक वेगळं स्थान निर्माण केलं. त्यामुळे या कथेचा पुढचा भाग घेऊन येणं हा आमच्यासाठी आनंदाचा आणि तितकाच महत्त्वाचा निर्णय आहे. दहा वर्षांनंतर पुन्हा एकदा या कुटुंबाला एकत्र आणताना पहिल्या भागाशी जोडलेल्या आठवणी आणि प्रेक्षकांच्या अपेक्षा या दोन्हींचा विचार केला आहे. यावेळीही प्रेक्षकांना हसवणारा, विचार करायला लावणारा आणि मनाला भिडणारा अनुभव देण्याचा आमचा प्रयत्न असेल.”

हे ही वाचा : राजकीय मतभेद बाजूला! शरद पवारांच्या भेटीसाठी नेत्यांची रीघ, ब्रीच कँडी रुग्णालयात काय घडलं?

पहिली झलक प्रेक्षकांसमोर

पर्पल पेबल पिक्चर्स आणि मॅगीज पिक्चर्स यांची निर्मिती असलेल्या ‘व्हेंटिलेटर 2’चे लेखन आणि दिग्दर्शन राजेश मापुस्कर यांनी केलं आहे. प्रियंका चोप्रा जोनस, डॉ. मधु चोप्रा आणि राजेश मापुस्कर हे या चित्रपटाचे निर्माते आहेत. चित्रपटाचे चित्रीकरण लवकरच सुरू होणार असून या नव्या पर्वाची पहिली झलक प्रेक्षकांसमोर आणली आहे. आता दहा वर्षांनंतर कामेरकर कुटुंबात नेमकं काय घडणार, हे पाहाणं औत्सुक्याचं ठरणार आहे.