BJP List : पहिल्या यादीने महाराष्ट्रातील भाजप नेत्यांचं वाढवलं टेन्शन, कारण...

तत्पूर्वी समजून घेऊयात उमेदवारांच्या यादीबद्दल महत्त्वाच्या गोष्टी भाजपने पहिली यादी जाहीर केली, या यादीत 34 मंत्र्यांच्या नावांचा समावेश आहे, ज्यांना पक्षाने लोकसभा 2024 निवडणुकीसाठी उमेदवारी घोषित केली आहे. पंतप्रधान नरेंद्र मोदी आगामी लोकसभा निवडणूक वाराणसी मतदारसंघातून, केंद्रीय गृहमंत्री अमित शाह गांधीनगरमधून आणि संरक्षणमंत्री राजनाथ सिंह लखनऊ मतदारसंघातून लढणार आहेत.

तर याशिवाय भाजपने तीन माजी मुख्यमंत्री शिवराज सिंह चौहान, सर्बानंद सोनोवाल आणि बिप्लब कुमार देब यांना लोकसभा निवडणुकीसाठी तिकीट दिले आहे. शिवराज सिंह मध्य प्रदेशातील विदिशा, सोनोवाल आसाममधील दिब्रुगडमधून आणि देब पश्चिम त्रिपुरामधून निवडणूक लढवणार आहेत.

हर्षवर्धन, मीनाक्षी लेखी, रमेश बिधुरी यांचा पत्ता कट

भाजपने अनेक विद्यमान खासदारांची तिकीटं कापली आहेत. यामध्ये माजी केंद्रीय आरोग्यमंत्री हर्ष वर्धन, केंद्रीय परराष्ट्र राज्यमंत्री मीनाक्षी लेखी, केंद्रीय राज्यमंत्री रामेश्वर तेली, केंद्रीय राज्यमंत्री जॉन बारला यांच्याशिवाय रमेश बिधुरी, साध्वी प्रज्ञा, केपी यादव आदींच्या नावांचा समावेश आहे. हर्षवर्धन हे राजधानी दिल्लीतील चांदनी चौक मतदारसंघाचे विद्यमान खासदार आहेत.

हेही वाचा >> BJP च्या 195 उमेदवारांची संपूर्ण यादी, महाराष्ट्रातील केवळ एका नेत्याचा समावेश

त्यांच्या जागी भाजपने प्रवीण खंडेलवाल यांना आगामी लोकसभा निवडणुकीसाठी चांदणी चौकातून उमेदवारी दिली आहे. त्याचप्रमाणे मीनाक्षी लेखी या सध्या मध्य दिल्लीच्या खासदार आहेत, त्यांच्या मतदारसंघातून भाजपने सुषमा स्वराज यांच्या कन्या बन्सुरी स्वराज यांना उमेदवारी दिली आहे.

साध्वी प्रज्ञाच्या जागी आलोक शर्मा यांना भोपाळमधून तिकीट मिळाले

2019 मध्ये ज्योतिरादित्य शिंदे यांना त्यांच्या बालेकिल्ल्यात गुनामध्ये धक्का देणारे केपी यादव, हे यावेळी भाजपकडून तिकीट मिळवण्यात अपयशी ठरले आहेत. आगामी लोकसभा निवडणुकीसाठी भाजपने शिंदे यांना गुना येथून मैदानात उतरवले आहे. 

आपल्या विधानांमुळे अनेकदा चर्चेत राहणाऱ्या साध्वी प्रज्ञा सिंह यांचे तिकीट कापण्यात आले आहे. त्या भोपाळच्या विद्यमान खासदार आहेत. त्यांच्या जागी भाजपने भोपाळमधून आलोक शर्मा यांना तिकीट दिले आहे. पश्चिम बंगालमधील अलीपुरद्वार मतदारसंघाचे खासदार आणि केंद्रीय अल्पसंख्याक मंत्रालयातील राज्यमंत्री जॉन बारला यांना यावेळी तिकीट मिळालेले नाही. अलीपुरद्वारमधून त्यांच्या जागी पक्षाने दोन वेळा आमदार मनोज तिग्गा यांना उमेदवारी दिली आहे.

केंद्रीय राज्यमंत्री तेलींचाही पत्ता कट

आसाममधील दिब्रुगडमधून विद्यमान खासदार रामेश्वर तेली यांचेही तिकीट भाजपने रद्द केले आहे. ते केंद्रीय कामगार आणि रोजगार मंत्रालयात राज्यमंत्रीही आहेत. त्यांच्या जागी भाजपने सर्बानंद सोनोवाल यांना दिब्रुगडमधून उमेदवारी दिली आहे. ते बंदरे, जहाजबांधणी आणि जलमार्ग आणि आयुष मंत्रालयात कॅबिनेट मंत्री आहेत. 

हेही वाचा >> भाजपच्या पहिल्या यादीत महाराष्ट्राला का स्थान नाही?

भाजपने दक्षिण दिल्लीतील विद्यमान खासदार रमेश बिधुरी यांनाही यावेळी तिकीट दिलेले नाही. त्यांच्या जागी भाजपने दक्षिण दिल्लीतून रामवीर सिंह बिधुरी यांना उमेदवारी दिली आहे. रामवीर सिंह बिधुरी सध्या बदरपूरचे आमदार आणि दिल्ली विधानसभेतील विरोधी पक्षनेते आहेत.

महाराष्ट्रातील नेत्यांचं वाढलं टेन्शन

भाजपने पहिल्या यादीत १९५ उमेदवारांच्या नावांची घोषणा केली. यात केंद्रीय मंत्र्यांचाही पत्ता कट करण्यात आला आहे. त्यामुळे महाराष्ट्रातील भाजप नेत्यांचं टेन्शन वाढलं आहे. महाराष्ट्रातही अनेक विद्ममान खासदारांचे पत्ते कट होणार असल्याची चर्चा गेल्या काही दिवसांपासून सुरू आहे. पहिल्या यादीने याला आणखी हवा दिली आहे. 

केंद्रीय मंत्री असलेल्या नेत्यांनाही तिकीट न देता पक्ष संघटनेच्या कामाची जबाबदारी दिली जाऊ शकते, असे म्हटले जात आहे. त्याचबरोबर काही मतदारसंघातील भाजप खासदार जिंकून येण्याची शक्यता कमी आहे, त्यांना डच्चू दिला जाऊ शकतो. भाजपने पहिल्या यादीतून याचे संकेत दिले आहेत. त्यामुळे भाजप महाराष्ट्रातील कोणत्या विद्ममान खासदारांचे पत्ते कापणार आणि कोणत्या इच्छुकांना मोह आवरावा लागणार याची उत्सुकता वाढली आहे.