राजकीय गणितांच्या आधारावर बांधल्या गेलेले अंदाज खरे ठरले. भाजपने उमेदवारी दिलेल्या एनडीएच्या उमेदवार द्रौपदी मुर्मू राष्ट्रपतीपदाच्या निवडणुकीत विजयी झाल्या. द्रौपदी मुर्मू यांनी युपीएचे उमेदवार यशवंत सिन्हा यांचा मोठ्या फरकाने पराभव केला. या विजयाबरोबरच द्रौपदी मुर्मू या राष्ट्रपती पदावर विराजमान होणाऱ्या पहिल्या आदिवासी महिला ठरल्या आहेत.
-राष्ट्रपती निवडणुकीत विजय मिळवत देशातील सर्वोच्च पदावर पोहोचलेल्या द्रौपदी मुर्मू या पहिल्या आदिवासी महिल्या ठरल्या आहेत. त्याचबरोबर राष्ट्रपती होणाऱ्या त्या दुसऱ्या महिला आहेत.
-राष्ट्रपती पदाच्या निवडणुकीत द्रौपदी मुर्मू यांनी यशवंत सिन्हा यांचा मोठ्या फरकाने पराभव केला. द्रौपदी मुर्मू यांना एकूण ५ लाख ७७ हजार ७७७ मते मिळाली. द्रौपदी मुर्मू या देशाच्या १५व्या राष्ट्रपती बनल्या आहेत.
-राष्ट्रपती निवडणुकीत एकूण ३,२१९ सदस्यांनी (खासदार आणि आमदार) मतदान केलं. या मतांचं मूल्य ८३८८३९ इतकं आहे. यापैकी द्रौपदी मुर्मू यांना २,१६१ मते (मतांचं मूल्य ५,७७,७७७) मिळाली. तर यशवंत सिन्हा यांना १,०५८ (मतांच मूल्य २,६१,०६२) मते मिळाली आहेत.
- भारताचे राष्ट्रपती हे देशाचे प्रमुख असण्याबरोबरच भारतीय लष्कराच्या तिन्ही दलाचेही प्रमुख असतात, त्याचबरोबर देशाचे प्रथम नागरिक असतात. द्रौपदी मुर्म या दुसऱ्या महिला राष्ट्रपती ठरल्या आहेत. यापूर्वी प्रतिभा पाटील यांनी देशाच्या पहिल्या महिल्या राष्ट्रपती म्हणून काम केलेलं आहे.
-राज्यसभेचे महासचिव पीसी मोदी यांनी दिलेल्या माहितीनुसार मतमोजणीच्या तिसऱ्या फेरीत कर्नाटक, केरळ, मध्य प्रदेश, महाराष्ट्र, मणिपूर, मेघालय, मिझोराम, नागालँड, ओडिशा आणि पंजाब या राज्यातील मतांची मतमोजणी झाली. या फेरीत १,३३३ मतं वैध ठरली. त्यांचं मूल्य १,६५,६६४ इतकं आहे. द्रौपदी मुर्मू यांना या फेरीत ८१२, तर यशवंत सिन्हा यांना ५२१ मतं मिळाली.
- राष्ट्रपती पदाच्या निवडणुकीत तब्बल १७ खासदारांनी एनडीएच्या उमेदवार द्रौपदी मुर्मू यांना मतदान केल्याचं दिसत आहे. भाजपकडूनही तसा दावा करण्यात आला आहे.
