नाशिक: शासकीय कोरोना टेस्टिंग लॅबच्या अहवालापेक्षा खासगी लॅबमध्ये कोरोना पॉझिटिव्हचे आकडे जादा दाखवल्याचे जिल्हा रुग्णालयाच्या तपासणीत निष्पन्न झाले असून जिल्हाधिकारी सूरज मांढरे यांनी दातार जनेटिक्स लॅबला पुढील आदेश येइपर्यंत कोरोना स्वॅब टेस्टिंग करण्यास बंदी घातली आहे. तसेच याप्रकरणी शहरातील सुप्रीम डायग्नोस्टिक व ठाण्यातील तुर्भे येथील थारोकेअर लॅबमधील अहवालाची फेर तपासणी करुन अहवाल सादर करण्याचे आदेश जिल्हा शल्य चिकित्सक व महापालिका आरोग्य अधिकारी यांना दिले आहेत.
मागील काही दिवसांपासून शहर व जिल्ह्यात करोना पॉझिटिव्ह रुग्णाचा आकडा आश्चर्यकारकरित्या वाढला आहे. शासकीय लॅबपेक्षा खासगी लॅबमध्ये स्वॅब टेस्टिंगमध्ये तुलनेने पॉझिटिव्हचे आकडे जादा असल्याचे समोर येत होते. खासगी लॅब करोना संकटाची संधी साधत आकडे फुगवून दाखवत असल्याची चर्चा होती. शेवटी याप्रकरणी पालकमंत्री छगन भुजबळ यांनी शासकीय व खासगी लॅबमधील आकडेवारीची तपासणी करण्याचे आदेश दिले होते. त्यानुसार दातार जनेटिक्स लॅबमधील स्वॅब टेस्टिंग केलेल्या रुग्णांची जिल्हा रुग्णालयाकडे फेरतपासणी केले असता १६ पैकी ७ रुग्णांचे अहवाल निगेटिव्ह असल्याचे निष्पन्न झाले. तसेच सुप्रीम डायग्नोस्टिक या लॅबचे पॉझिटिव्ह रेट अवाजवी असल्याचे निष्पन्न झाले आहे. तर थाअरोकेअर ही प्रयोगशाळा तुर्भे येथे असल्याने ठाणे येथील जिल्हाधिकार्‍यांना स्वॅब टेस्टिंगची फेरतपासणीचे पत्र देण्यात आले आहेत.
दातार जनेटिक्स याप्रकरणात दोषी आढळल्याने पुढील आदेश येईपर्यंत या ठिकाणी करोना स्वॅब टेस्टिंगवर बंदी घालण्यात आली आहे. तसेच दातार जेनेटिक्स लॅब कायमस्वरुपी बंद करण्यात का येऊ नये? याबबतचा खुलासा मागविण्यात आला आहे. तसेच सुप्रीम डायग्नोस्टिक लॅबमधील स्वॅबची फेरतपासणीचे आदेश जिल्हा शल्य चिकित्सक व महापालिका आरोग्य अधिकारी यांना देण्यात आले आहेत.
फेरतपासणीमध्ये असे निघाले निष्कर्ष
– शासकीय लॅबमध्ये पॉझिटिव्ह रेट 7.8% टक्के असताना दातार व थाअरोकेअर लॅबमध्ये पॉझिटिव्ह रेट 20% पेक्षा जादा
– सुप्रीम डायग्नोस्टिकमध्ये पॉझिटिव्ह रेट 18.7%
– सर्वाधिक चाचण्या दातार लॅबमध्ये करण्यात आल्या असून पॉझिटिव्ह रेट सर्वाधिक
दातार जेनेटिक्सवर ठपका
– स्वॅब तपासणी आयसीएमआर मार्गदर्शक तत्वाप्रमाणे झाली नाही
– चाचणी अहवालाचे व्यक्तिश: विश्लेषण झाले नाही
– सीटी व्हॅलूज मॅन्युअल अटेंशन 30 पेक्षा जादा असल्यास त्याची शहानिशा रुग्णाच्या लक्षणानुसार बघणे गरजेचे असते. त्याचे उल्लंघन झाले
– कोरोना टेस्टिंग तपासणी अहवाल 10% अनिर्णयित अशा रुग्णांचे रिपोर्ट आयसीएमआर मार्गदर्शनानुसार पुन्हा सॅम्पल घेऊन तपासणी करणे आवश्यक असताना त्याची अंमलबजावणी झाली नाही.
– स्वॅब घेण्याच्या मार्गदर्शक सूचना आहेत. नमुन्यांचे गुणात्मक दर्जा व त्याच्या गुणवतेबद्दल अहवाल आढळून येत नाही.
जिल्हाधिकारी नेमकं काय म्हणाले?
‘विसंगत व चुकीच्या अहवालामुळे रुग्णांचे आरोग्य व कोरोना विषयक उपाय योजनांवर प्रतिकूल परिणाम होण्याची भीती आहे. त्यामुळे पुढील आदेश येईपर्यंत दातार लॅबमध्ये कोरोना चाचणीस बंदी घालण्यात आली आहे. दातार लॅबने आयसीएमआरकडून उपलब्ध यंत्र सामग्रीची प्रमाणीकरण करुन घ्यावे व त्याचा अहवाल सादर करावा. ही लॅब कायमस्वरुपी बंद का करण्यात येऊ नये? याबाबत दातार लॅबने जिल्हाप्रशासनाकडे खुलासा करावा.’
सुप्रीम डायग्नोस्टिक लॅबचे पॉझिटिव्ह दर जादा असून जिल्हा शल्य चिकित्सक व महापालिका आरोग्य अधिकार्‍यांनी फेरतपासणी अहवाल सादर करावा. ठाणे येथील थायरोकेअर लॅबला जिल्हाधिकारी ठाणे यांच्यामार्फत पाठविण्यात आलेल्या फेरतपासणी बाबतच्या पत्राचा जिल्हा शल्यचिकित्सकांनी पाठपुरावा करुन अहवाल सादर करावा असे आदेश सूरज मांढरे यांनी दिले.
