कर्जाचं ओझं! एसटीचालकाने बसमध्येच घेतला गळफास; अहमदनगरमधील धक्कादायक घटना

सकाळी साडेसहा वाजताच्या सुमारास पाथर्डी-नशिक (एम. एच. १४, बी. टी. ४८८७) या बसमध्ये चालकाने गळफास घेऊन आत्महत्या केली. संगमनेर बसस्थानकात ही बस उभी होती. सुभाष तेलोरे (रा. कोल्हार कोलूबाईचे, ता. पाथर्डी, जि. अहमदनगर) असं या चालकाचं नाव आहे.

पहाटे पाच वाजता ते व इतर चार सहकारी प्रात: विधी व इतर आटोपून फ्रेश झाले होते. त्यानंतर त्यांनी इतरांना सांगितलं की, ‘मी पुढे जातो, तुम्ही पाठीमागून या.’ त्यानंतर पंधरा मिनिटांनी एसटी बस वाहक येथे आला असता, त्याला गळफास घेतलेल्या अवस्थेत चालकाचा मृतदेह आढळून आला.

सुभाष तेलोरे यांनी मृत्यूपूर्वी एक चिठ्ठी लिहून ठेवलेली होती. या चिठ्ठीमध्ये त्यांच्यावर सुमारे साडेसहा लाख रुपये कर्ज असल्याचं नमूद केलेलं आहे. कर्जाला कंटाळून त्यांनी आत्महत्या केल्याचा प्राथमिक निष्कर्ष पोलिसांनी काढला आहे. उत्तरीय तपासणीसाठी त्यांचा मृतदेह संगमनेरच्या कॉटेज रुग्णालयात पाठवण्यात आला आहे.