शिरसाटांचे संभाव्य मंत्रिपद हुकणार? विस्तारापूर्वीच अॅड. सदावर्तेंनी केले गंभीर आरोप

गुणरत्न सदावर्ते यांनी काय केले आरोप :

मुंबई उच्च न्यायालयाच्या औरंगाबाद खंडपीठाच्या न्यायधीशांच्या निवासासाठी इमारत बांधण्यात येत आहे. या बांधकामासाठी निविदा प्रक्रिया योग्य पद्धतीने राबवली नाही. हे कंत्रात ४७ कोटी रुपयांचे आहे. मात्र यासाठी वंडर ही कंपनी अपात्र आहे. या कंपनीने निविदा भरताना बीडमध्ये सात मजली रुग्णालयाचे बांधकाम केल्याचे सांगितले आहे.

मात्र संबंधित इमारत सात मजल्यांची नाही. चुकीची माहिती सादर करून या कंपनीने कंत्रात मिळवले. त्याचवेळी वर्क ऑर्डर देण्याआधी आमचे पक्षाकार बाबा कंस्ट्रक्शन कंपनीला संजय शिरसाट यांच्या स्वीय सहाय्यकांनी बोलावले. तिथे आमच्या पक्षकाराला धमकी देण्यात आली. ही बाब न्यायालयाच्या लक्षात आणून देण्यात आली आहे, असा आरोप सदावर्ते यांनी केला.

शिरसाटांचे संंभाव्य मंत्रिपद हुकणार?

दरम्यान, या आरोपांमुळे संजय शिरसाट यांचे संभाव्य मंत्रिपद हुकणार का? असा सवाल सध्या विचारला जात आहे. यापूर्वी विस्तारात स्थान न मिळाल्याने संजय शिरसाट नाराज असल्याच्या चर्चा आहेत. याबाबत त्यांनी त्यांची नाराजी जाहीरपणे बोलूनही दाखवली आहे. याशिवाय संघटनेतील नेतेपदावरही शिरसाट यांना संधी देण्यात आलेली नाही.